Türkiyening samsung shehiride Uyghurlarni qollash namayishi ötküzüldi

Ixtiyariy muxbirimiz arslan
2018-11-15
Élxet
Pikir
Share
Print
Türkiyening samsung shehiride ötküzülgen Uyghurlarni qollash namayishidin körünüsh. 2018-Yili 12-noyabir.
Türkiyening samsung shehiride ötküzülgen Uyghurlarni qollash namayishidin körünüsh. 2018-Yili 12-noyabir.
RFA/Arslan

12-Noyabir küni türkiyening samsung shehiride xitayning Uyghurlar üstidin yürgüzülüwatqan bésim siyasitige qarshi Uyghurlarni qollash namayishi élip bérildi.

Bu namayish sherqiy türkistan teshkilatlar birlikining samsungdiki wekili xélil islam'oghlining uyushturushi we bir qisim ammiwi teshkilatlarning qollishi bilen ötküzüldi. Namayishchilar aldi bilen samsung shehirining wezir köpru nahiyesidiki général faruq jümert baghchisigha jem bolup, u yerdin nahiyelik wezirköprü hökümet binasi aldighiche yürüsh qildi. Namayishchilar qollirida ay-yultuzluq kök bayraq we türlük lozunkilarni kötürgen halda "Heq-hoquq, adalet, türkistan'gha höriyet! ishghalchi xitay sherqiy türkistandin chiqip ket!" dégendek sho'arlarni towlidi.

Namayishqa istanbuldin alahide teklip bilen qatnashqan "Sherqiy türkistan yéngi nesil herikiti" ning re'isi doktor abdusalam teklimakan yürüsh axirida söz qilip, Uyghurlarning hazirqi ehwali toghrisida pikir bayan qildi. U sözide her yili Uyghur diyarida eng az 3000 kishining sewebsiz yoqap kétiwatqanliqini bildürdi.

Abdusalam teklimakan sözide yene 12-noyabir künining tarixta sherqiy türkistan jumhuriyiti qurulghan kün ikenlikini xatirilitip ötti we 3-qétim musteqil sherqiy türkistan jumhuriyitining qurulushini ümid qilidighanliqini ipadilidi.

U yene xitay da'irilirining Uyghur diyarida "Qoshmaq tughqanchiliq" dégen nam astida Uyghurlarning diniy we milliy örp-adetlirige haqaret qiliwatqanliqini, Uyghurlarning nöwette insan chidap turalmaydighan éghir zulum tartiwatqanliqini ilgiri sürdi. U yene "Biz musulmanlarning bu mesilide mes'uliyitimiz bar, shuning üchün bu zulumni hemmimiz birlikte toxtitishqa tirishishimiz kérek," dédi.

Sherqiy türkistan teshkilatlar birlikining qaradéngiz wekili xélil islam'oghli söz qilip, "Xitayning sherqiy türkistan xelqi üstidin yürgüzüwatqan zulumlirini toxtitish üchün hemmimiz bir yürek, bir gewde bolushimiz kérek," dédi.

Namayishqa wezirköprü yashlar xizmiti we tenterbiye mudiri, ma'arip uyushmisining wezirköprü shöbisi mes'uli hesen tursun, aq partiyening wezirköpru shöbisi bashliqi mehmet qurt qatarliqlarmu qatnashti.

Türkiyening samsung wilayiti wezirköpru nahiyeside élip bérilghan bu namayish toghrisida türkiyening "Millet", "Höriyet" qatarliq chong gézitliride we ijtima'iy taratqularda xewerler bérildi.

Ziyaritimizni qobul qilghan abdusalam teklimakan bu xil pa'aliyetlerning Uyghurlarni tonushturushta muhim ehmiyetke ige ikenlikini, shuning üchün özining istanbuldin samsunggha bérip bu pa'aliyetke qatnashqanliqini bildürdi.

Toluq bet