Gumidiki ahaliler: öyimizde 15 minuttin artuq olturghan qoshnimiznimu saqchigha melum qilimiz

Muxbirimiz shöhret hoshur
2017-05-30
Share
urumchi-uyghur-kocha-namrat.jpg Ürümchining melum kochisidiki Uyghurlar. 2010-Yili 3-iyul, ürümchi.
AFP

Melum bolushiche, gumida bu yil 14-féwral pichaqliq hujum weqesi yüz bergendin kéyin, xitayning gumidiki bixeterlik tedbirliri yene bir baldaq kücheygen. Gumida ahaliler 250 métir néridiki qoshnisi bolsimu, eger bir-birining öyige kirip 15 minuttin artuq olturup qalsa, öy igisi ehwalni saqchixanigha melum qilip qoyushi kérek iken. Bu tüzüm ziyaret qilghuchi bir kishi bolsimu, yéshi 14 yash bolsimu ijra qilinishi shert iken. Gumida ahaliler melum qilghan bu ehwalni saqchi xadimlirimu ret qilmidi.

Bu yil 14-féwral küni gumida yüz bergen pichaqliq hujum weqesidin kéyin, xitay da'iriliri 3 neper gumandarning a'ile-tawabi'atidin 50 ke yéqin kishini qamaqqa alghandin bashqa, ular olturushluq mehellidin 200 ge yéqin kishini 3 kün'ge qeder kent qorusigha solap qoyghan idi. Eyni künlerde bu heqtiki xewerlirimizge inkas yazghan bir anglighuchi radiyomizgha mektup yollap, xitay yolgha qoyghan kolléktip jazalash tedbirining bir mehelle kishiliri bilen cheklinip qalmighanliqini, belki guma nahiyisi boyiche ijra qiliniwatqanliqini bayan qilghan. U buninggha pakit körsitip guma nahiyiside, qoshnilar ara kirip chiqishningmu nazaret astigha élin'ghanliqini tilgha alghan. Bu uchur aridin 4 ay ötkende guma nahiyisining choda we muji yéziliridiki ahaliler teripidin delillendi.

Radiyomizgha yollan'ghan mektupta, gumida nöwette mehellidiki chong-kichik herqandaq bir kishining qoshnilirini ziyaret qilishtin awwal özlirini saqchigha melum qilishi kérekliki yézilghan. Ahaliler 14 yashtin ashqan balilarning qoshna ziyaritimu nazaret astida ikenlikini bayan qildi.

Mektupta déyilishiche, gumida tughqanlar ara we qoshnilar ara a'ile ziyaritining saqchi teripidin nazaret astigha élin'ghinigha ikki yildin ashqan, emma burun a'ile ziyariti 2 sa'ettin ashqan ehwalda saqchigha melum qilish telep qilin'ghan؛ 14-féwral weqesidin kéyin meyli tughqan, meyli qoshna bolsun 15 minuttin ashqan a'ililerde élip bérilghan herqandaq ziyaret, söhbet we uchrishishining choqum saqchigha melum qilinishi telep qilin'ghan. Ahaliler tam qoshnisi bilen kirip-chiqishningmu nazaret astida ikenlikini ashkarilidi.

Mektupta déyilishiche we gumidiki ahalilerning bayan qilishiche, gumida ahaliler, öylirige méhman kelgen ehwalda méhman kélishtin awwal we tarqalghanda bolup saqchigha ikki qétim doklat qilishi kérek.

14-Féwral pichaqliq hujum weqeside 5 neper xitay köchmen ölgen we 3 neper gumandar neq meydanda étiwétilgen. Muhajirettiki Uyghur közetküchiler, xitayning 3 gumandarni sotsiz atqanliqini we ularning qilmishi üchün bir mehelle ahalisini kolléktip jazalighanliqini tenqid qilghan idi. Bügünki uchurdin qarighanda, jaza obyéktining bir mehelle emes, bir nahiye ahalisi bolghanliqi közge chéliqmaqta. Matériyallarda körsitilishiche, guma nahiyisining nopusi 249200, buning 97.96% Ni Uyghurlar teshkil qilidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.