“Ana til dersliki” namliq kitab türkiyede neshrdin chiqti

Chet'eldiki Uyghur nopusining köpiyishige egiship, chet'eldiki Uyghurlarda ana til öginishke bolghan qiziqishmu kücheymekte.

Uyghurlarning bu telipini qandurush meqsiti bilen ana til pa'aliyetchisi, Uyghur ziyaliysi abduweli ayup ependi yazghan “Uyghur a'ile ma'aripi qollanmiliri-ana til dersliki” namliq eser istanbul tedbir neshriyati teripidin neshrdin chiqti. Kitab 164 bettin terkib tapqan bolup, Uyghurchidin sawati chiqmighan yaki chala chiqqan 6 yashtin 10 yashqiche bolghan balilarning Uyghurche öginishi üchün teyyarlan'ghan.

Kitab heqqide ziyaritimizni qobul qilghan mezkur kitabning tüzgüchisi abduweli ayup ependi, chet'eldiki Uyghurlarning jiddiy telipige bina'en bu kitabni tüzüp chiqqanliqini bayan qildi.

Abduweli ayup ependi kitabning Uyghurlargha xas balilar qoshaqliri, mesel we balilar chöchekliri, aptorning eserliridin tékistler we meshiqlerni öz ichige alghanliqini otturigha qoydi.

Abduweli ayup ependi “Ana til dersliki” kitabini peqet mekteplerde Uyghur tili ögitish üchünla emes, balilargha a'ililerde Uyghurche ögitishnimu nezerde tutup, bu kitabning omumiy ismini“A'ile ma'aripi qollanmisi” dep qoyghanliqini ilgiri sürdi.

Merkizi milletler uniwérsitétini püttürgendin kéyin, istanbulda tetqiqat ishliri bilen shughulliniwatqan batur qaraxan ependi abduweli ayup yazghan we bundin kéyin dawami chiqidighan “A'ile ma'aripi qollanmisi-ana til dersliki” namliq eserning bir boshluqni toldurghanliqini ilgiri sürdi.

Abduweli ayup ependi Uyghur diyarida ana til dersliki namida kitabning barliqini, emma uning peqetla Uyghur balilargha kommunist idiyesini singdürüsh meqsitide teyyarlan'ghanliqini, buning bolsa ilmiy, balilar qobul qilalaydighan, Uyghurlarning milliy en'enisini singdürüsh meqsitide teyyarlan'ghanliqini tekitlidi.

Türkiyediki hajiteppe uniwérsitétining  tarix oqutquchi, doktor erkin ekrem ependi  abduweli ayupning mezkur derslik kitabigha yuqiri baha bérip, bu xildiki Uyghur ana til  dersliklirining we Uyghur tili oqutushning  chet'ellerdiki  Uyghurlarning milliy kimlikini saqlap qélishta muhim ehmiyetke ige ikenlikini bildürdi.