"Yashliq awazi" guruppisi yashlarning bilimini sinash musabiqisi ötküzdi

Ixtiyariy muxbirimiz féruze
2018-10-30
Élxet
Pikir
Share
Print
3-Nöwetlik "Bilim oyuni" ilmiy musabiqisidin bir körünüsh. 2018-Yili 27-öktebir. Bishkek, qirghizistan.
3-Nöwetlik "Bilim oyuni" ilmiy musabiqisidin bir körünüsh. 2018-Yili 27-öktebir. Bishkek, qirghizistan.
RFA/Feruze

Qirghizistandiki Uyghur yashliri öz milliy kimlikige köngül bölüp, yash-ösmürlerning bilimge bolghan qizghinliqini ashurush üchün, yashlar ara bilim musabiqilirini, yeni zéhin sinash musabiqe oyunlirini ötküzmekte. 27-Öktebir küni bishkek shehiride "Bilim oyuni" dep atalghan ilmiy musabiqining üchinchi qétimliqi ötküzüldi.

Bügünki künlerde qirghizistanda yashawatqan Uyghur yashlirining öz ana tili, medeniyiti, tarixi we bashqa sahelerdiki bilimlirini ashurush üchün "Yashliq awazi" namliq Uyghur yashliri topi "Bilim oyuni" ni uyushturup, Uyghur yashlirini öz tarixini we milliy kimliki bilishke righbetlendürüp kelmekte. "Bilim oyuni" pa'aliyitige qatnashqan yashlar sekkiz tür boyiche bilim musabiqisi ötküzgen bolup, ular peyghemberning hayati, qirghizistan tarixi, Uyghur tarixi we medeniyiti, tenterbiye, chinggiz aytmatof ijadiyiti, merkiziy asiya döletliri, meshhurlarning séymasi qatarliq mezmunlargha munasiwetliktur. Musabiqe élip bérilghan her bir tür 10 so'alni öz ichige alghan. 

Mezkur musabiqige Uyghur yashliridin 7 guruppa qatnashti, ular özlirining guruppilirigha özgiche namlarni bergen bolup, bularning ichidiki "Ottuz oghul", "Qedinas", "Sebre" qatarliq guruppilar bilen birge mezkur musabiqige birinchi qétim qatnashqan "Uyghurlar biz", "Altun oghul", "Zepiran" dep atalghan guruppilarmu öz maharetlirini körsetti. Mahirlarning köpinchisi bu musabiqige tunji qétim qatnashqan bolsimu, lékin özlirining maharetlirini yéterlik derijide körsitishke tirishti. Ularning musabiqige kitab we intérnéttin köpligen uchur-melumatlarni izdep, xéli teyyarliq bilen kelgenliki melum.

"Bilim oyuni" gha qatnashqan "Sebre" guruppisining ezasi ummigülsüm oyun uyushturghuchilargha rehmitini bildürdi. U mezkur oyun'gha üchinchi qétim qatnishiwatqan bolup, bu qétim birinchilikke érishken. U, bu oyunda Uyghur yashlirining öz ana tili we medeniyiti toghrisida köp bilimlerge érishkenlikini alahide tekitlidi. U mundaq dédi: "Essalamu'eleykum, biz 'sebir' topi, mana üch qétim oynap bügün üchinchi oyunimizda biz birinchilikke érishtuq. Deslepki oyunlarda biz üchinchi, andin ikkinchi orunlarni igiligen iduq, mana bügün biz birinchilikke érishtuq. Bizning topimizdikilerni bu oyun'gha men bashlap kelgen idim, ular unimighan bolsimu men köndürüp ekeldim. Bu shundaq yaxshi bilimlik oyun, biz her bir oyundin jiq nersilerni öginimiz. 'yashliq awazi' topigha rehmitimizni bildürimiz. Insha'alla kélechekte yene musabiqe oyunliri bolsa biz yene qatnishimiz".

"Bilim oyuni" dep atalghan ilim musabiqisi üch sa'ettin artuq dawamlashqan bolsimu, barliq qatnashquchilar yuqiri keypiyatta olturup bérilgen so'allarni muhakime qilishti. Mezkur oyun'gha birinchi qétim qatnashqan "Zepiran" topining ezasi zeytune bu musabiqe oyunidin xursen bolghanliqini éytip we mundaq oyunlarning, yeni, bilim jehette zéhin sinash musabiqilirining köprek ötküzülüshini xalaydighanliqini bildürdi. U mundaq dédi: "Méningche mushundaq oyunlar bek yaxshi, biz ajayip jiq nersilerni ögenduq, köp nersilerni bilmigen ikenmen, qollirimghimu yazdim toghra jawablarni, bek yaqti bu oyun, her da'im shundaq musabiqiler bolup tursun".

Bu oyun'gha qatnishish üchün alayiten qazaqistanning almuta shehiridin murat isimlik yigit kéliptu. U radi'o ziyaritimizni qobul qilip, bu oyun'gha özining ikkinchi qétim qatnishiwatqanliqini we bu oyundin xursen bolghanliqini éytip, buning yashlarning tereqqiyatida we milliy kimlikini janlandurushida muhim rol oynaydighanliqini tekitlidi. .

"Yashliq awazi" ezalirining éytishiche, ular öktebirde bu yil pilan qilin'ghan oyunlarning hemmisini tamamlidi, ular kélechekte yene mundaq oyunlarni, yeni musabiqilerni uyushturmaqchiken, emma ular 2018-chi yilining axirqi ikki éyi ichide "Yashliq awazi mukapati" pa'aliyitini teyyarlash üchün nurghun pa'aliyetlerni ötküzmekchi iken.

Musabiqining netijiside "Sebre" guruppisi birinchilikke, "Qedinas" we "Ottuz oghul" topliri ikkinchi we üchinchilikke érishti.

Bu qétimqi musabiqini bahalighuchi bolghan tébbiy ilimler doktori reshidem abdullayéwa bu xil musabiqilerning yashlarning öz milliy medeniyiti heqqidiki chüshenchilirini ashurushta muhim rol oynaydighanliqini bildürdi.

Toluq bet