Uyghur mektepliridiki ten jazasi we ata - anilarning endishisi (1)

Ixtiyariy muxbirimiz eziz
2016-03-25
Élxet
Pikir
Share
Print
Mekteplerdiki balilarni urush hadisisi
Mekteplerdiki balilarni urush hadisisi
Photo: RFA

Ijtima'iy taratqular arqiliq Uyghurlar jem'iyitige melum boluwatqan, shundaqla köp qisim ata - anilarni bi'aram qiliwatqan ré'al mesililerning biri herqaysi mekteplerdiki dersxanilarda közge chéliqidighan oqughuchilarni urush we ulargha ten jazasi bérish mesilisidur. Ziyaritimiz jeryanida alaqidar organlar we ata - anilar bu ehwallarning mewjutluqini, shundaqla özlirining bu heqtiki endishilirini ipadilidi.

Yéqinda féysbok qatarliq ijtima'iy taratqularda ürümchidiki melum ottura mektepning dersxanisida bir Uyghur oqutquchining birnechche oqughuchini qatar turghuzup qoyup, qolidiki süpürge bilen oqughuchilarni tapshuruq ishlimeslikte eyiblep bir bashtin urup chiqqanliqi heqqidiki widi'o tarqalghan. Arqa rettiki oqughuchilar bu körünüshlerni bashqilargha bilindürmey téléfon arqiliq widi'ogha éliwalghanliqtin, aldi rette olturghan oqughuchilarning mektep formisidiki mektep nami bu ishning qeyerde bolghanliqidin melumat béridu.

Uyghur mektepliridiki oqughuchilargha qaritilghan ten jazasigha da'ir ehwallarni igilep béqish üchün merkiziy sheher ürümchidiki ma'arip sistémisi bilen alaqilishish jeryanida ürümchi sheherlik 3 - ottura mektep oqughuchilirining ötken yili ürümchi shehirining bashliqi ilham sabirgha yazghan ochuq xéti we ilham sabirning jawab xéti diqqitimizge chüshti.

Ochuq xette oqughuchilar mekteptiki oqutquchilarning oqughuchilarni uridighanliqi we xalighanche ten jazasi béridighanliqigha da'ir qilmishlarni hemde oqughuchilarning ghururigha tégish ehwalining éghirliqini inkas qilghan. Shuning bilen birge, nawada yuqiridin mupettish xadimliri kélip tapshuruq miqdari, oqutquchilarning ten jazasi qollinish ehwali, mekteplerning artuqche heq yighiwélish ehwali qatarliqlar heqqide so'al sorap qalsa, oqughuchilar jezmen mektep teripidin aldin teyyarlap bérilgen inkar qilish xaraktéridiki yalghan jawablarni bérishi telep qiliniwatqanliqini pash qilghan. Ata - anilar bolsa mektep rehberlikining oqughuchilarni kolléktip yalghanchiliqqa righbetlendürüshtek bu xil qilmishidin nahayiti ghezeplen'gen.

Halbuki, ürümchi sheherlik hökümetning saybagh rayonluq ma'arip idarisi arqiliq 3 - ottura mektepke yetküzgen jawabida bu ehwallarning natoghra yosunda otturigha chiqqanliqi étirap qilin'ghan bolsimu, sheherlik hökümet bu heqte bashqilar razi bolghudek hel qilish charisini otturigha qoyalmighan. Eksiche qélipliship qalghan koniche usulda "Pat yéqinda hel qilish ümidide" boluwatqanliqi eskertilgen.

Uyghur aptonom rayonining merkizi bolghan ürümchi shehirining siyaset jehette bashqa rayonlardin xélila erkin bolidighanliqidek ré'alliqni közde tutup, mezkur ehwallarning qaysi derijide ikenlikini éniqlap baqmaqchi bolduq. Bu jeryanda ziyaritimizni qobul qilghan ürümchidiki bir ana özining bilidighanlirini biz bilen ortaqlashti.

Ürümchining tudunxaba rayonida olturushluq yene bir kishimu bir qisim mekteplerdiki oqutquchilarning ten jazasi bérish qilmishi heqqide anglighanlirini bayan qildi.

Shuning bilen biz, oqughuchigha ten jazasi bériwatqan oqutquchi heqqidiki widi'ogha asasen shu mektep bilen alaqileshtuq. Mektepning ilmiy mudiri deslep buni inkar qilghan bolsimu, axirida shundaq bir ishning bolghanliqini étirap qildi.

Toluq bet