Уйғур академийәси 10 нәпәр уйғур оқуғучиға 2018 йиллиқ «тәвпиқ оқуш мукапати» беришни қарар қилди

Ихтиярий мухбиримиз әркин тарим
2018-03-02
Share
tewpiq-mukapati-2018.JPG Уйғур академийисиниң тор бетидики 2018-йиллиқ тәвпиқ оқуш мукапатиға аит язма.
RFA/Erkin Tarim

Баш штаби истанбулдики уйғур академийәси йеқинда 10 нәпәр уйғур оқуғучиниң 2018-йиллиқ «тәвпиқ оқуш мукапати» ға еришкәнликини билдүрди.

Түркийәдә оқуватқан уйғур оқуғучилар саниниң көпийишигә әгишип, уларниң оқушиға ярдәм бериш вә иқтисадий қийинчилиқлирини һәл қилиш үчүн түркийәдә паалийәт елип бериватқан уйғур академийәси «тәвпиқ оқуш мукапати» тәсис қилған иди. 2014-Йили тәсис қилинған мәзкур мукапат түркийәдә өз расхоти билән яхши оқуватқан, иқтисадий җәһәттин қийинчилиқи бар оқуғучиларға һәр йили тарқитилип кәлмәктә.

Уйғур академийәси 2018-йиллиқ «тәвпиқ оқуш мукапати» ға еришкән оқуғучиларниң тизимликини елан қилди. Бу мунасивәт билән радийомиз зияритини қобул қилған уйғур академийисиниң башлиқи абдулһәмид қарахан әпәнди 2018-йили 1-айниң 30-күни мукапатқа илтимас қилиш тоғрисида уқтуруш тарқатқанлиқини, 25 нәпәр уйғур оқуғучиниң илтимас қилғанлиқини, буниң ичидин нәтиҗиси әң яхши болған 10 оқуғучиға оқуш мукапати беришни қарар қилғанлиқини баян қилди. 

Мәркизи истанбулда турушлуқ уйғур академийәси 4 йилдин буян «тәвпиқ оқуш мукапати» ни тарқитип кәлмәктә. Уйғур академийәси чәтәлләрдики мәрипәтпәрвәр карханичилар билән тиҗарәтчиләрниң ярдими вә ианисини қобул қилип, уни оқуш мукапати тәриқисидә яхши оқуватқан, әмма иқтисадий ярдәмгә моһтаҗ уйғур оқуғучиларға тарқитип кәлмәктә. Академийәниң башлиқи абдулһәмид қарахан әпәнди мәзкур оқуш мукапатини елиш үчүн уйғур оқуғучиларниң қандақ шәртләрни һазирлиши керәклики һәққидә тохталди.

Истанбул тиҗарәт университетиниң 4-йиллиқ оқуғучиси бурһан сәләй зияритимизни қобул қилип, өткән йилидин тартип юрти билән болған алақиси үзүлүп қалғачқа өзиниң иқтисадий җәһәттин қийнилип қалғанлиқини, йеқинда уйғур академийисиниң оқуш мукапатиға илтимас сунуп мәзкур мукапатқа еришкәнликини баян қилди. 

Мәлумки, түркийә уйғурлар әң көп олтурақлашқан дөләтләрниң бири һесаблиниду. Түркийәдә явропа дөләтлиридикидәк мусапирларға турмуш ярдәм пули берилмәйду. Түркийәдә даңлиқ университетларға имтиһан берип яхши кәсипләргә өткән уйғур оқуғучилар көп болсиму, әмма улар оқуш һәққини төләштә қийналмақта. Булардин бири өткән йили истанбул университетиниң қанун кәспигә талланған уйғур қиз-аминә бараттур. У, өзиниң аилисидә 9 җанниң яшайдиғанлиқини, иккисиниң нөвәттә университетта оқуватқанлиқини, дадисиниң түрк тилини яхши билмигәчкә техичә иш тапалмиғанлиқини, өзиниң мәзкур оқуш мукапатиға еришкәнликидин бәкла хурсән болғанлиқини баян қилди.

Зияритимиз җәрянида аминә барат йәнә истанбул университетиниң қанун кәспидә тиришип оқуп, кәлгүсидә вәтини вә миллити үчүн хизмәт қилидиғанлиқини билдүрди.

2017-Йили мисирда оқуватқан оқуғучиларни хитай һөкүмити хитайға қайтишқа мәҗбурлиғанда, бу оқуғучиларниң көпи түркийәгә келивалған иди. Уларниң көпи түркийәдики университетларға орунлашқан болсиму, әмма юрти билән болған алақиси кесилгән болғачқа, еғир иқтисадий қийинчилиққа дучар болмақтикән. Абдулһәмид қарахан әпәнди бу һәқтә тәпсилий мәлумат бәрди. У, бу оқуғучиларға иқтисадий җәһәттин ярдәм қилишни халайдиған уйғурларниң икки хил йол билән ярдәм қилса болидиғанлиқини билдүрди.

Уйғур академийәси 2009-йили 9 нәпәр уйғур зиялийси тәрипидин қурулған болуп, һәр йили түрлүк темиларда илмий муһакимә йиғинлири чақирғандин сирт, 2014-йилидин бүгүнгичә яхши оқуватқан 49 уйғур оқуғучиға оқуш мукапат пули тарқатқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.