Merhum abdulhekimxan mexsum wapatining bir yilliqini xatirilesh murasimi ötküzüldi
2017.12.25

Merdum diniy alim we ijtima'iy pa'aliyetchi abdulhekimxan mexsum wapatining bir yilliqi munasiwiti bilen istanbulda xatirilesh murasimi ötküzüldi.
Merhum abdulhekimxan mexsum sherqiy türkistan ma'arip we hemkarliq jem'iyiti, sherqiy türkistan ölimalar birliki qatarliq muhajirettiki Uyghur jem'iyetlirining qurulushida asasliq rol oynighan shexs idi. Merhumning wapatining bir yilliqi munasiwiti bilen 22-dikabér küni istanbulda “Ustazgha wapa kéchisi” dégen namda xatirilesh murasimi ötküzüldi.
Murasim sherqiy türkistan ma'arip we hemkarliq jem'iyiti teripidin uyushturuldi. Murasimgha merhumning yéqin dost-yarenliri, yurt chongliri, we türkiyediki sherqiy türkistan ammiwi teshkilatlarning rehberliri, merhumning sepdashliri we oqughuchiliri shundaqla muhajirlar bolup köp sandiki jama'et qatnashti.
Murasimgha sherqiy türkistan ma'arip we hemkarliq jem'iyitining bash katipi abdul'ehet abduraxman riyasetchilik qildi. Murasim “Qur'an” tilawet qilish bilen bashlandi. Murasimda merhum abdulhekimxan mexsum hajim toghrisida teyyarlan'ghan höjjetlik filim körsitildi.Arqidin sherqiy türkistan ma'arip we hemkarliq jem'iyitining re'isi hidayetullah oghuzxan söz qilip, merhumning hayatidiki ish izliri toghrisida toxtaldi. Hidayetullah oghuzxan sözide merhumning bir ümidwar kishi ikenlikini, héch qachan ümidsizlinip baqmighanliqini, özini we bashqilarni her da'im ümidlik bolushqa ündeydighanliqini eslep ötti.
Murasimda oqughuchilar merhumgha atap yézilghan bir qanche parche mersiyelerni oqup ötti. Kéyin her qaysiy jem'iyetlerning re'isliri söz qilip, merhumning hayati we ish-izliri toghrisida toxtaldi we merhumni eslep ötti.
Murasimda yene dunya Uyghur qurultiyining mu'awin re'isi erkin ekrem, sherqiy türkistan ölimalar birlikining re'isi doktor atawullah shehyari, ihya fondining re'isi yüsüf ujalan, yawro-asya türk jem'iyetler fédératsiyesining re'isi isma'il chin'giz, eysa yüsüp aliptékin wexpining bashliqi ömer qul, yawropa sherqiy türkistan ma'arip jem'iyitining bash katipi eysa sawut, shiwétsiye Uyghur ma'arip jem'iyitining mu'awin re'isi exmet tursun, finlandiye Uyghur islam merkizining re'isi memet'éli qarim, se'udi erebistandin kelgen zhurnalist we tetqiqatchi sirajidin ezizi, dini ustaz hebibullah küseni, sutuq bughraxan wexpining mes'ulliridin ramizan chamlicha, türkiyening sabiq parlamént ezasi, proféssor jalal erbay qatarliqlar söz qildi. Ular, merhum abdulhekimxan mexsum hajimning hayati we ish izliri toghrisida toxtilip, uning Uyghur xelqining hörriyiti üchün élip barghan xizmetlirige yuqiri baha berdi.
Proféssor jalal erbay, merhum abdulhekimxan mexsum toghrisida toxtilip, merhumning tikken küchetlirining haman bir küni ösüp yétilip, méwe béridighanliqigha ishinidighanliqini bildürdi.
Murasimda söz qilghuchilar birdek, birlik-barawerlik we ittipaqlishishning bügünki künde hemmidin muhimliqini tekitlidi. Axirida mexmutjan damollamning qol kötürüshi bilen merhumning rohigha du'a oquldi. Sherqiy türkistanning hörlüki üchün du'a telep qilindi.