Фатима ханим: мән ана тилимни, динимни өгәнгәнликим үчүн бесимға учридим

Кейинки 20 йилдин бери һәр хил йоллар билән чәтәлгә чиқиватқан уйғурларниң сани күнсайин көпәймәктә. Чиқиватқан уйғурларға немишқа чәтәлгә чиққанлиқини сориғиниңизда буларниң көпи хитай һөкүмитиниң зулумиға чидиялмай чиққанлиқини илгири сүрмәктә.

Бундин 9 йил бурун уйғур дияридин чәтәлгә чиққан, исминиң фатима икәнликини ейтқан бир уйғур аял бизгә бешидин өткәнләрни аңлатти.

Униң ейтишичә у, ачисиниң өйидә қуран савадини чиқиришқа барғанда хәвпсизлик хадимлири сән немә үчүн бу йәргә көп келисән? дәп униң пейигә чүшкән. Кейинчә у өзиниң өйигә балиларни йиғип қуран вә уйғур тили өгәткән. Буни байқиған хитай хәвпсизлик хадимлири униң инисини солап, қийин - қистаққа елип көп қийниған, кейин укиси 3 йиллиқ қамақ җазасиға һөкүм қилинған. Бу вәқәдин кейин өз юртида яшаш имкани қалмиған фатима ханим үрүмчигә қечип чиқип китаб сетип җан беқишқа башлиған.

Җамаәт хәвпсизлик хадимлири уни үрүмчидиму раһәт қоюп бәрмигән, давамлиқ һалда уни назарәт астида тутуп турған. Фатима ханим хитай хәвпсизлик хадимлириниң тәқиб қилишидин қутулалмай ахири миң тәстә паспорт беҗирип чәтәлгә чиққан. Униң ейтишичә, у пәқәтла башқиларға ана тили билән динини өгәткәнлики үчүн бесим вә тәқипкә учриған. У, чәтәлгә чиққандин кейинму дөләтсизликниң көп дәрдини тартқан. Төвәндә фатима ханим билән елип барған сөһбитимизниң тәпсилатини аңлитимиз.