Елдос ғәйрәт 2015-йиллиқ норвегийә талант мунбириниң йерим һәл қилғуч мусабиқисигә талланған (1)

Мухбиримиз қутлан
2015-11-10
Share
eldos-gheyret-norwegiye-talant-munbiri.jpg 2015-Йиллиқ норвегийә талант мунбириниң йерим һәл қилғуч мусабиқисигә талланған уйғур маһир елдос ғәйрәт. 2015-Йили ноябир.
Photo: RFA

Яш нахшичи елдос ғәйрәтниң 2015-йиллиқ норвегийә талант мунбириниң йерим һәл қилғуч мусабиқисигә таллиниши уйғур тилидики иҗтимаий таратқуларда диққәт қозғимақта.

Биз бу һәқтә ениқ мәлумат елиш үчүн норвегийәдә олтурушлуқ яш нахшичи елдос ғәйрәт билән телефон сөһбити өткүздуқ. У өзиниң 13-ноябир норвегийә дөләт телевизийәсидә өткүзүлидиған йерим һәл қилғуч мусабиқигә тәйярлиниватқанлиқини билдүрди:

“мән 2011-йилиниң ахири норвегийәгә келип олтурақлаштим. Кичикимдә үрүмчидә мәктәптә оқуватқан чағлиримдила сәнәткә, болупму яш нахшичиларниң мода нахшилириға қизиқаттим. Өзүмдә бир сәнәт хуручиниң барлиқини һес қилаттим, әммә вәтәндә өзүмниң сәнәт саһәсидики бу артуқчилиқимни җари қилдуридиған пурсәткә еришәлмидим. Норвегийәгә кәлгәндин кейин бир тәрәптин тил өгинип, йәнә бир тәрәптин яшаш үчүн тириштим. Бир қетим тасадипийла телевизийәдин норвегийә талант мунбиригә қатнашқан маһирларниң нәқ мәйдан нахша мусабиқисини көрүп қалдим. Шу вақитта өз-өзүмгә соал қойдум: мән немә үчүн өзүмни синап көрмәймән? бәлким бу мениң өзүмдики алаһидиликни җари қилдуридиған бир сәһнә болуп қелиши мумкин. Әнә шу хиял билән мән норвегийәдә алдинқи бирқанчә қетимлиқ талант мунбири мусабиқилиригә қатнаштим һәм дәсләпки нәтиҗиләрни қазандим.”

У бизниң “сиз немә үчүн нахшилириңизни башқа маһирлардәк яки норвиш тилида вә яки инглиз тилида ейтмай, бәлки уйғурчә билән норвишчини арилаштуруп ейттиңиз” дегән соалимизға мундақ җаваб бәрди:

“сиз дегәндәк, башқа маһирларниң һәммиси нахшилирини сап норвиш тилида яки инглиз тилида ейтти. Мән нахшилиримниң текистини уйғурчә вә норвишчә арилаштуруп ейтиш усулини талливалдим. Немишқа десиңиз, бизниң бир чирайлиқ уйғур тилимиз бар. Нахшини сиз мәйли қайси тилда ейтмаң, униңдики әң муһим нәрсә туйғу, йәни аңлиғучиниң қәлб тарини чекәләйдиған сәнәт гүзәллики һәммидин муһим. Шуңа мән тәвәккүл қилип нахшамни уйғур вә норвиш тилида арилаштуруп ейттим. Дегәндәк буниң үнүми алаһидә болди. Баһалиғучиларниң ичидә бир чәтәллик мутәхәссис бар иди. У маңа мундақ деди: "елдос, мән сениң нахшаңни аңлаватқанда, өз ана тилиң билән ейтқан қисми маңа әң күчлүк тәсир қилди. Мән уйғур тилини билмәймән, әмма мәнму саңа охшаш башқа бир әлдин норвегийәгә келип олтурақлашқан сәнәткармән. Мән сениң нахшаңни өз тилиңда ейтқан қисмини аңлаветип шәхсән өзүм бәк һаяҗанландим, вуҗудум ерип кәтти. Сениңму өз тилиң билән нахшаңни әң юқири пәллигә көтүргәнликиңни һес қилдим." Униң бәргән баһаси маңа техиму зор ишәнч вә күч ата қилди!...”

Зияритимиз җәрянида елдос өзиниң “юртум”, “ана” қатарлиқ нахшиларни таллап ейтиштики сәвәблирини чүшәндүрүп өтти. У йәнә өзиниң йәрлик норвегийәлик оқутқучилири вә уйғур қериндашлириниң ярдимидә мәзкур нахшилириниң текистини норвиш тилиға тәрҗимә қилғанлиқини тәкитлиди.

Ахирида елдос радиомиз арқилиқ пүтүн дунядики уйғур җамаәтчиликидин бир-икки минут вақтини чиқирип өзи үчүн бир аваз ташлишини үмид қилидиғанлиқини билдүрди:

“13-ноябир күни мән йерим һәл қилғуч мусабиқигә қатнишимән. Һазирғичә болған нәтиҗилирим бир тәрәптин өзүмниң тиришчанлиқидин болса, йәнә бир тәрәптин өз хәлқимниң мәдәт бериши вә қоллап-қуввәтлишидин болди. Мән бир уйғур пәрзәнти болуш сүпитим билән вәтән ичи вә сиртидики уйғур җамаитидин икки минут қиммәтлик вақтини чиқирип маңа аваз беришини сәмимий үмид қилимән!”

У төвәндики улиништин 13-ноябир күни норвегийә дөләт телевизийәсидә өткүзүлидиған 2015-йиллиқ талант мунбириниң йерим һәл қилғуч мусабиқисигә аваз бәргили болидиғанлиқини тәкитлиди:

http://www.tv2.no/ua/7593824

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт