“истанбул сепиллири” шеирлар топлимиға зәйнурә әйсаниң шеири киргүзүлди
2013.05.07

Истанбул шәһири тарихта үч чоң мәдәнийәткә саһибханлиқ қилған, явропа билән асияни туташтурған әң қәдимий шәһәр болуш сүпити билән дунядики нурғун даңлиқ шаирларниң диққитини өзигә тартқан, шаирларға илһам мәнбәси болған иди. Өткән ай истанбулда “истанбул сепиллири” уйғурчә қилип ейтқанда “истанбул сепиллири” намлиқ шеирлар топлими нәшр қилинди.
Бу китабқа дунядики 100 шаирниң истанбул тоғрисида язған шеиригә орун берилгән болуп, буларниң ичидә уйғур шаирә зәйнурә әйса ханимму бар икән. Китабта униң истанбулға йеңи кәлгән вақтида истанбулни чирайлиқ бир тозға охшитип язған шеиригә орун берилгән.
Мәзкур китабқа грек, франсуз вә әрәб шаирлириниң истанбул һәққидә язған шеирлиридин башқа, түркийиниң әң даңлиқ шаирлиридин мәмәт акиф әрсой, назим һикмәт, ашиқ вәйсәл вә осман ташқай қатарлиқларниң истанбул тоғрисида язған шеирлириғиму орун берилгән.
“истанбул сепиллири” намлиқ шеирлар топлими истанбул валиси авни мутлуниң мадди ярдими билән бесип тарқитилған болуп, 297 бәтлик бу китабтики шеирлар декламатсийә қилинип ишләнгән к д пиластинкисиму китабқа қошуп тарқитилмақта. Шаирә зәйнурә әйса ханим радиомизға қилған сөзидә, түркләрниң әң даңлиқ шаирлириниң арисида өзиниң шеирлириғиму орун берилгәнликидин өзини интайин бәхтлик һес қиливатқанлиқини, пүтүн дуняға тарқитиливатқан бу китабта өз тәрҗимиһалиниңму барлиқини, буниң уйғурларни дуня җамаәтчиликигә тонутуш үчүн интайин әһмийәтлик икәнликини ейтти.
Төвәндә униң билән елип барған сөһбитимизни аңлаңлар.