Almatada ötken yashlar arisida boks boyiche xelq'ara musabiqige Uyghurlarmu qatnashti

Ixtiyariy muxbirimiz oyghan
2015-12-14
Share
Uyghur-eli-yash-bokschiliri-tenherket.jpg Uyghur éli yash bokschiliri trenerliri bilen. 2015-Yil 12-dékabir, almata.
RFA/Oyghan

Her yili almata shehiride ataqliq bokschi, qazaqistan jumhuriyitining xizmet körsetken trénéri ménggéréy xayrutdinof xatirisige béghishlan'ghan boks boyiche xelq'ara musabiqe ötküzülüp turidu.

Uninggha qazaqistanning her xil sheherlirining boks kulublirining, ottura asiya jumhuriyetliri, shundaqla rusiye, kuba, ezerbeyjan we bashqimu memliketlerning yash ten-heriketchiliri qatniship, özlirining mahirliqini namayish qilip kelmekte. Bu musabiqige shundaqla Uyghur rayonining bokschilirimu pat-patla qatnishidu. Mesilen, 2011-yili ötken musabiqide Uyghur tenheriketchiliri xéli utuqlargha érishken idi. Atap éytqanda zulpiqar mehemmet'eli altun médalgha, alim hoshur kümüch médalgha, qurbanjan chong, abduréhim ibrahim, eysa qarilar bolsa, mis médalgha érishken. Buningdin tashqiri Uyghur rayonining yene bir mahir bokschisi memet tursunmu qazaqistanda ötken musabiqilerde asiya chémpiyoni atalghan idi.

Almatada ötken bu qétimqi 14-xelq'ara musabiqige yette dölettin 160 bokschi qatnashti. Omumiy netije boyiche qazaqistanliqlar alte altun médal bilen birinchi orunni, ikkinchi orunni özbékistanliq tenheriketchiler égilidi. Mezkur musabiqige Uyghur élining ürümchi shehiridin yette neper yash bokschi qatnashqan bolup, ulardin abduréshit rehmitulla ikkinchi orun'gha, merdan memet üchinchi orun'gha érishti.

Uyghur rayonining bokschilirini mana bir nechche yil mabeynide meshiqlendürüp kéliwatqan trénér wladimir ziyaritimizni qobul qilip, m. Xayrutdinof xatirisige béghishlan'ghan mezkur musabiqe heqqide toxtilip, mundaq dédi: “Biz bu musabiqige en'ene boyiche kéliwatimiz. Hazir chong yashtiki bokschilarmu ilgiri mushu yerge kélip, özlirining küchini sinighan. Bu yerge bir yil mabeynide özlirining tejribisini analiz qilghan tenheriketchiler keldi. Bu intayin yaxshi musabiqe. Musabiqe intayin küchlük boldi. Biz mana bu musabiqige yette adem élip kelduq. Biri ikkinchi, biri üchinchi orunni igilidi. Lékin yashlar üchün bu netije yaman emes. Bu qétimda 98-we 99-yillarda tughulghanlar élindi. Bu yashlar mezkur musabiqige deslep qétim qatnashsimu, amma özlirining küchlirini sinap ülgerdi. Biz bu yerde bir nechche kün mabeynide ular bilen meshiqlerni, bashqa bokschilar bilen uchrishishlarni ötküzüwatimiz. Bu jehette qazaqistanda yaxshi mutexessisler, trénérlar yéterlik. Ular bizge kélip turidu. Bu qétimda biz bu yerge kelduq. Kéyinki yili sattarxanof xatirisige béghishlan'ghan musabiqige kelmekchimiz.” wladimir öz sözide uzun yillar tashkentte, andin yawropada ishligenlikini, hazir bolsa ürümchide yash bokschilarni meshiqlendürüsh bilen shughulliniwatqanliqini ilgiri sürdi.

Radi'omiz ziyaritini qobul qilghan yash bokschi abduréshit rehmitulla özining yetken utuqliri hem buningdin alghan tejribiliri heqqide toxtaldi: “Meshiqni bashlighan waqtim 2010-yil 9-ay, qeshqer shehiride tenterbiye mektipige kirdim. 2013-Yil 9-ayda ürümchi sborniy komandigha kirdim. Bir yil meshiq qilip, ürümchide sheherlik 10-musabiqide 2-orun aldim. 2015-Yili 10-ayda taldiqorghanda xelq'ara musabiqige qatniship, ikkinchi, almatada ikkinchi orunni aldim. Ata-anilirim méni qollaydu. Özlirimu boksni yaxshi köridu. Mezkur sinaqtin özüm boksni yaxshi körgenliktin öttüm. Andin ata-anamning ümidini aqlap, xelqimge xizmet qilsam deymen. Men ülge éliwatqan özimizning komandisidin chiqqan asiya chémpiyoni bolghan memettursun akam, qanat islam akam bar. Chet'ellik bokschilardin qazaqistanliq golofkin bar. Ularning heriketliridin yaxshi ögendim. Kona bokschilardin roy dzhonis, muhemmet élidek bokschilarning herikitini ögendim, bu musabiqilerde yardem qiliwatidu. Aldimda wetinimge ‏- ürümchige barghandin kéyin, hazir we uning aldida oynighan musabiqilerdin özümning yighqan tejribilirimni jughilap, bu musabiqilerdiki xataliqlarni, qaysini yaxshi, qaysini yaman qildim shularni ügenmekchimen.”

Almatada ötken bu musabiqining échilish hem mukapatlash murasimigha qazaqistanning ataqliq bokschiliri abduréshit abduraxmanof, andréy kurnyawka, kérem abduraxmanof, érmaxan ibrahimof, baqit sarsékbayéf we bashqilar qatnashti.

Emdi qazaqistandin boks boyiche yétilip chiqiwatqan Uyghur yashliri barmu? bar bolsa ular kimler? biz bu heqte qazaqistanning boks mahiri dolqun kamékofqa muraji'et qilghinimizda u mundaq dédi: “Uyghur balilirining olimpik oyunlirigha qatnishishini niyet qilip, men özüm on yil burun 15-20 balini yighip, teyyarliq qilghan. Ene shulardin hazir yétilip chiqqini mijitof dilmurat qazaqistan boyiche yashlar arisida chémpiyon boldi. Qizimiz rena perhatowa bu yili qazaqistan boyiche chémpiyon boldi. Her ikkilisi chong musabiqilerge teyyarliq qiliwatidu. Ulardin tashqiri mushu almata shehiride chémpiyon bolup yürgen balilarmu bar. Meqset qilghinimiz shularni dunya musabiqilirige, yeni braziliyediki olimpik oyunlirigha élip bérishni niyet qiliwatimiz.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet