Uyghur élining qismen jaylirida qizil tarqiliwatqanliqi melum

Muxbirimiz gülchéhre
2015-12-23
Share
osme-kesel-bimar-2.jpg Ösme késellikliri doxturxanisida yataqqa puli yoq, kéchini talada ötküzüwatqan Uyghur bimarliri we ularning iptarliqni öchiret bilen qobul qiliwatqan körünüshi. 2013-Yili awghust, ürümchi.
ijtima’iy alaqe wasitiliri

Ili oblastining qismen jayliridin igiligen melumatlirimizgha qarighanda, bu yil dékabir kirishi bilenla élida qizil tarqilishqa bashlighanliqi melum.

Uyghur élidiki yuqumluq késelliklerning aldini élish tarmaqlirimu bügün qizildin yuqumlinishning aldini élish waksinisi emlesh heqqide jiddiy uqturush tarqatqan. Da'irilerning agahlandurushidin qarighanda, rayonda bu yil qizil tarqilishning ilgiriki yillardikidinmu baldur bashlan'ghanliqi melum.

Ürümchi we uning etrapidiki qismen jaylarda charwa mallarda bir xil yuqumluq késellik tarqalghanliqi heqqide radi'omizgha kelgen inkaslargha asasen bu heqte melumat élish üchün biz 22-dékabir nilqa nahiyilik yuqumluq késelliklerning aldini élish merkizige téléfon qilghinimizda, téléfonni alghan xadim nilqida charwa mallarda késellik tarqilishidin xewiri yoqluqini bildürgen bolsimu, uning bayanliridin ili oblastida 12-ayning béshidin bashlap qizil tarqiliwatqanliqi we xadimlarning yuqumlinishni kontrol qilish üchün tekshürüsh we waksina emleshtek jiddiy tedbir qolliniwatqanliqi ashkarilan'ghan idi.

Biz qizil yuqum ehwali heqqide qoshna nahiyilerdinmu ehwal igilep körduq. Künes nahiyilik doxturxanining jiddiy qutquzush bölümi xadimi: “Yéqinqi künlerde qizil chiqip doxturda yétiwatqan balilar bek jiq” dédi.

U yene qizil bilen aghrighanlar ichide chonglarmu barliqini, késel pewqul'adde köpiyip qalghanliqini, ular köp bolghanliqtin hemmisini yuqumluq késellikler bölümige yötkewatqanliqini éytti.

Biz qizil tarqilishning tepsiliy ehwalini igilesh üchün yene ili oblastliq yuqumluq késelliklerning aldini élish merkizige téléfon qilduq, emma ular ili oblastida qizil tarqiliwatqanliqini inkar qildi.

Ili oblastliq we sheherlik yuqumluq késellikning aldini élish organliri qizil tarqiliwatqanliqini birdek inkar qilghan bolsimu, ili oblastliq “Dostluq doxturxanisi” ning balilar bölümining doxturi yéqindin buyan qizil yuqumi örligenlikini bildürdi.

U mundaq dédi: “Hazir balilarda qizil tarqilishning ötkür boluwatqan waqti, oblastining hemme yerliridin balilar bar. Balilar bölümimizde qizil bilen aghrighan balilar xéli köp. Ishqilip bizning doxturxanida shundaq, bashqilarni bilmeymen.”

U yene balilargha asasen waksina emlen'gen ehwaldimu, waksina küchidiki cheklik tüpeyli wirusning dawamliq yuqush éhtimali barliqini bildürdi.

U mundaq dédi: “Shundaq yuqumlinish éhtimali bar, qizil waksininingmu cheklimiliki bar, besh-alte yildin kéyin mudapi'elinish tesirini yoqitishi mumkin, shunga waqtida yéngilap emlep turush kérek. Qizil töt pesilning hemmisidila chiqishi mumkin, immunitét küchige baghliq, emma qish we etiyaz peslide bekrek tarqilidu.”

Ürümchi sheherlik késelliklerni kontrol qilish merkizi 23-dékabir omumiy uqturush chiqirip, Uyghur élining qismen jaylirida qizil tarqalghanliqi, dékabirning béshidin bashlap hazirghiche yuqumlinishning téz kéngiyiwatqanliqi melum bolghanliqi, jaylarning waksina emlesh ishlirini jiddiy omumlashturushi zörürlükini agahlandurghan.

Uqturushta körsitilishiche yene, bu yil 10-aydin hazirghiche bayqalghan qizil yuqum ehwali bulturqi oxshash mezgildikidin 8.4 Hesse yuqiri chiqqan bolup asasliqi 8 ayliqtin 3 yashqiche bolghan balilarda köprek körülgen, yuqumdarlar ichide qorumigha yetkenler texminen 20% ni igiligen.

Ürümchi sheherlik yuqumluq késelliklerni kontrol qilish merkizi yene, bu yil qizil yuqumining hazirqi mezgilde tarqilishining binormal bir ehwal ikenlikini we sewebining téxi éniq emeslikini eskertken.

Aptonom rayonluq sehiye nazaritining torida bérilgen qizil yuqumi heqqidiki melumatlarda 1991-yilidin tartip Uyghur rayonida qizil wirusidin ibaret bu qedimi késelning tarqilishining memliket boyiche aldinqi 5-orunni igilep kéliwatqanliqi 2011-yilidiki 8 ayliqtin 13 yashqiche balilarning qizil yuqum statistikisida bolsa, Uyghur rayoni qizil yuqumining memliket boyiche eng éghir bolghanliqi körsitilgen.

Sehiye mutexessislirining qizil heqqidiki sawatlirida körsitishiche, qizil chiqqan balilarda adette bala qizip üchinchi, tötinchi künliri quliqining keynige qizil chiqishqa bashlap, pütün beden'ge taraydiken, kéyinche öpke yallughi, kanay yallughini keltürüp chiqiridiken.

Ularning qarishiche, mezkur wirus éghir bolghanda yürek we chong méngini ziyan'gha uchritishi mumkin bolup, shunga qizighan haman doxturgha élip kélip körsitish, waqtida dawalash intayin zörür iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet