Ziyaretchilerning bayanliri taylandtiki musapirlarning 10 aydin buyanqi éghir qismetlirini ashkara qilmaqta

Igilishimizche, taylandta tutup turuluwatqan musapirlarning hazirqi ré'al ehwali köpligen kishiler we sahelerning diqqitini chékiwatqanliqi melum.

10 Aydin buyan tayland tewesidiki lagérlarda we chégradin qanunsiz kirgen köchmenlerni tutup turush orunlirida nechche yüzligen musapirlarning qamilip yatqanliqi ilgiri sürülmekte.

Yéqinda mezkur musapirlar arisidiki 3 yashliq bir balining tubérkulyoz késelliki bilen qaza qilishi taylandtiki musapirlarning éghir qismetlirini yenimu ashkara qildi.

Undaqta, köp qismining ayallar we balilar ikenliki ilgiri sürülüwatqan bu musapirlarning hazirqi ré'al ehwali we kündilik hayati zadi qandaq boluwatidu?

Yéqinda taylandqa bérip kelgen istanbuldiki “Erk téléwiziyisi” ning riyasetchisi abduraxman öztürkning bayanliri bu heqtiki melumatlarni yenimu toluqlaydu.

Abduraxman öztürk ziyaritimiz jeryanida özining türkiyediki bir kino cholpini bilen yéqinda taylandqa barghanliqi hemde u yerde tutup turuluwatqan musapirlarning ehwali heqqide köpligen uchurlarni igiligenlikini bayan qildi.

Uning bildürüshiche, sherqiy-jenubiy asiyadiki döletlerge, bolupmu taylandqa qachaq yollar bilen kirgen, kimliki téxiche éniqsiz bolghan musapirlar ötken yilining mart ayliridin bashlap tayland saqchiliri teripidin bayqilishqa bashlighan.

Ular deslep taylandtiki bir qanchilighan waqitliq musapirlar lagérigha qamalghan. Andin er-ayallar ayrilip bangkok shehiri we bashqa bir qanchilighan sheherlerdiki tutup turush merkezlirige élip kélin'gen. Bu yerning shara'iti emeliyette türme bilen oxshash bolup, bezi öylerge 50-60 adem, bezi chongraq zallargha hetta yüzlerche tutqunlar xuddi qotan'gha qoyni solighandek solap qoyulghan. Issiq we nem hawa, nachar shara'it, yémeklik we pakiz suning kemchilliki, yuqumluq késelliklerning tarqilishi seweblik bu yerge qamalghan musapirlar rohiy we jismaniy jehettin qattiq charchighan. Bolupmu ayallar bilen balilar qiyin ehwalda qalghan. 10 Aydin buyan bu yerdiki bir tutup turush ornigha qamalghan ayallardin alteylen boshan'ghan.

Yéqinda doxturxanida 45 kün yétip qaza qilghan 3 yashliq abdulla taylandtiki tutup turush orunlirida késellik bilen ölgen kishilerning üchinchisi iken. Tutup turush ornidiki qiyin shara'it ichide boshan'ghan ayallar bilen yéngi tughulghan bowaqlarning ehwali téximu nachar iken.

Abduraxman öztürk ependi ziyaritimiz jeryanida xelq'araliq insan heqliri teshkilatlirining taylandtiki bir qisim shöbiliri hemde taylandtiki islam diniy jem'iyetliri mezkur musapirlargha yardem qilishqa tirishiwatqanliqini ilgiri sürdi. Undin bashqa, türkiye we bashqa ellerdinmu bezi ammiwi teshkilatlar we xeyr-éhsan jem'iyetlirining heriketke kelgenlikini tekitlidi.

U yene taylandtiki tutup turush orunlirigha qamalghan musapirlarni ziyaret qilishning mumkinlikini, sirttin kelgen her xil yardemler, jümlidin kiyim-kéchek, yémek-ichmek, her xil dora we bashqa yardem buyumlirining saqchilarning nazariti bilen musapirlarning qoligha bérilidighanliqini ilgiri sürdi.

Tepsilatini awaz ulinishtin anglighaysiz.