Qeyseride Uyghur balilargha héytliq sowghatlar tarqitildi

Ramzan éyi musulmanlar arisida öz-ara yardemlishish, öz-ara hemkarlishish, öz-ara chüshinish küchiyidighan bir ay. Musulmanlar 30 kün rozi tutush bilen birlikte kéche-kündüz ibadet qilip allahgha du'a qilip tileklirining emelge éshishini telep qilidu. Qolida bar kishiler kembeghellerge yardem qilidu. Mana bu jehettin türkiyediki eng chong ammiwi teshkilatlardin biri bolghan IHH yeni insaniy yardem weqpi 7-ayning 12-küni malayshiya we tayland arqiliq türkiyening qeyseri shehirige kélip olturaqlashqan Uyghurlarning balilirigha héytliq kiyim-kéchek we pul tarqitip berdi.

IHH Yardem weqpi qeyseri shöbisi mes'uli xatiche xanim 60 etrapida Uyghur balini magizin'gha élip bérip xalighan kiyim-kécheklerni élip berdi we axirida ulargha héytliq pul tarqatti. Arqidin bazar we baghchilarni aylandurdi. Buningdin qattiq xursen bolghan balilar türk teshkilatigha rehmet éytti.

Biz bu heqte melumat igilesh üchün bu Uyghurlarning ishlirini béjirip kéliwatqan d u q mu'awin re'isi séyit tümtürk ependi bilen söhbet élip barduq. U, türkiyediki bolupmu qeyseridiki ammiwi teshkilatlarning malayshiya we tayland arqiliq qeyserige kélip olturaqliship qalghan Uyghurlargha köp yardem qilghanliqini, bulardin IHH teshkilatining 12-iyul küni 60 etrapida Uyghurgha héytliq kiyim-kéchek we pul tarqitip söyündürgenlikini éytti.

U, türk xelqining Uyghur musapirlargha méhmandostluqini körsetkenlikini, hazir 1000 etrapida Uyghur 4 yil yétip yése yetküdek yardem buyumlirining ambargha yighilghanliqini bayan qildi. Bu Uyghurlar ramzan éyini ibadet we du'a qilish bilen ötküzüwatqanliqini, yolda tartqan japa-musheqqetlerni unutturush üchün tirishiwatqanliqini bayan qildi.