Ottura asiya tebi'iy gaz turuba qurulushi xitaygha yiligha 30 milyard kub métir tebi'iy gaz yetküzüdu

Xitay uzundin buyan pilan qiliwatqan ottura asiya tebi'iy gaz turuba qurulushi özbékistanning buxara shehiride bashlan'ghan bolup, komteks xewerler torida xitay döletlik néfit - tebi'iy gaz hessidarliq guruhi élan qilghan xewerlerdin neqil élip körsitishiche, qurulush bashlan'ghan küni xitay dölet igidarchiliqidiki néfit guruhi özbékistanning perghane wadisidiki néfit ishlepchiqirish nisbitini ilgiri sürüsh xususida özbék néfit gaz shirkiti bilen toxtam tüzgen.
Muxbirimiz jüme xewiri
2008.07.07

 Mezkur turuba liniyisining omumiy uzunluq 1818 kilométir bolup, xewerde körsitilishiche, ottura asiya tebi'iy gaz turuba liniyisi, türkmenistan chégrisidin bashlinip özbékistan we jenubi qazaqistandin késip ötüp, Uyghur élining qorghas rayonigha tutashturilidiken.

Mezkur turuba léniyisige ishlitilidighan gaz turubiliri qélin polattin qosh liniyilik qilip yasilidighan bolup, yasash qurulushigha xitay néfit - tebi'iy gaz hessidarliq guruhi, özbék néfit gaz shirkiti we qazaqistan döletlik néfit we tebi'iy gaz shirkiti ortaq küch chiqiridiken.

Xewerde ashkarilinishiche, ottura asiya tebi'iy gaz turuba liniyisi birinchi qurulushi 2009 - yili, ikkinchi qurulushi 2010 - yili tamamlinip ishqa kirishtürülidiken.

Melum bolushiche, mezkur turuba liniyisi xitay 2004 - yili tamamlighan Uyghur ilidin bashlinidighan gherbning gazini sherqqe yötkesh turuba liniyisi qurulushining bir qismi bolup, bu ikki turuba liniyisi bilen xitaygha yiligha 30 milyard kub métir tebi'iy gaz yetküzilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.