Xitay - qazaqistan chégrachiliri tunji qétim birleshme charlash élip bardi

 Buning xitay - qazaqistan munasiwet tarixidiki yéngiliq ikenlikini ilgiri sürgen shinxu'a agéntliqining uchuridin ashkarilinishiche, 16 - iyun küni xitay terep chégra mudapi'e ponkiti bilen qazaqistan terepning chégra saqlash etritining komandirliri arisidiki söhbettin kéyin birlikte charlash élip bérishqa pütüshüp, ikki terepning 16 adimi jéminey nahiyisidin bashlap, 67 nomurluq chégra abidisi bilen 26 nomurluq chégra abidisi arisidiki 400 kilométrliq liniyide charlash élip barghan hemde her bir chégra abidisining yénigha kelgende xatire süretlirige chüshken.

Mezkur chégra liniyisining yer tüzülüshi murekkep bolup, taghliq, qumluq, édirliq we ormanliqlardin terkip tapqan bolghachqa charlash ishlirimu qiyin bolghan. Chégra liniyisidiki bir qisim jaylar sabiq sowét ittipaqi dewride talash - tartish üstide bolup, ikki terep arisida da'im chégra jidelliri bolup turghan idi. Qazaqistan - xitay chégra liniyilirining biri chaghantoqayda bolsa, 1969 - yili toqunush kélip chiqip, sowét qoshunliri éghir qorallarni ishqa sélip, xitay terepning bir charlash qoshunini qirghin qilghan idi.

1997 - Yili qazaqistan bilen xitay ikki dölet arisidiki bir qisim chégra liniyiliridiki talash - tartishlarni axirlashturup, 2000  - yillargha kelgende barliq chégrilarni éniq békitken.

Bu qétimqi charlashning meqsetliride siyasiy mewqe tekitlenmigen. Emma, qazaqistan bilen xitayning shangxey hemkarliq teshkilati ramkisi astida Uyghur musteqilchilirige zerbe bérish meqsitide térrorchiliqqa qarshi turush nami astida birleshme herbiy manéwir ötküzgenliki hemde bu mesile boyiche hemkarliq kélishimliri tüzgenliki sir emes.