8 яшлиқ диларә қошниси тәрипидин он нәччә күн қийнап өлтүрүлгән

Мухбиримиз гүлчеһрә
2016-01-21
Елхәт
Пикир
Share
Принт
«Йүткәнләрни тапайли пидаийлар әтрити» чиқарған, йоқап кәткән 8 яшлиқ диларә абдумиҗитни издәш уқтуруши. 2015-Йили декабир.
«Йүткәнләрни тапайли пидаийлар әтрити» чиқарған, йоқап кәткән 8 яшлиқ диларә абдумиҗитни издәш уқтуруши. 2015-Йили декабир.
Social Media

Бир ай илгири ақсу шәһәр топлуқ йезисида 8 яшлиқ диларәниң күп-күндүздә йоқап кетиши, униң ата, аниси вә йеқинлирини зор әндишигә салған болса, 19 күн болғанда бу нарисидиниң җәситиниң өз мәһәллисидин тепилиши пүтүн йезини вәһимә ичигә алған. Нәтиҗидә уларни техиму қаттиқ шүркәндүргини болса бу нарисидини рәһимсизләрчә қийнап өлтүргән қатилниң дәл диларәниң там қошниси болуп чиқишидур. Кишини ойға салидиғини, әҗәба диларәниң булап қечилип, та қийнап өлтүрүлүп җәсити тепилғичә болған он нәччә күн ичидә 10 миңдин артуқ нопусқа игә бу йезида я сақчи, яки башқиларниң бу қәбиһ җинайәттин гуманлиқ бир шәпә туймаслиқидур.

Диларә абдумиҗит топлуқ йеза мәркизи башланғуч мәктәп 2-йиллиқниң әлачи оқуғучиси, аилидә 3 балиниң чоңи вә әтиварлиқ бир тал қиз иди, у 2015-йили 12-айниң 20-күни йәкшәнбә чүштин бурун 9йерим әтрапида йоқап кетип 19 күндин кейин мәһәллисидин җәсити тепилған. Диларә абдумиҗитниң юрти ақсу шәһириниң топлуқ йезиси 6 кәнттин тәркиб тапқан, асаслиқ уйғурлар олтурушлуқ нопуси 10 миңдин ашидиған бир кичик йеза. Диларә бир туғқан қериндашлири билән бирликтә йолниң қаршисидики тағисиниң өйигә тапшуруқ ишләш үчүн хушал чиқип кәткән пети қайтип кәлмиди, өзиниң мәһәллисидә йоқап кәтти. Униң һаммисиниң ейтип беришичә, та униң җәсити тепилғучә арилиқта, сақчилар җиддий һәрикәт қилмиған болсиму, униң аилисидикиләр, мәктәптики оқутқучи, савақдашлири, қошна ‏-қолум вә пидаийлар бирликтә уни издәшни тохтатмиған, әмма бәхткә қарши диларәниң тоңлап қалған җәсити шу йезиниң өзидин тепилған.

Сақчилар униң җәсити үстидики тәкшүрүш нәтиҗисини мушу дүшәнбә күни аилисигә бәргән болуп, униңда диларәниң басқунчилиққа вә қаттиқ җисманий хорлуққа учриғанлиқи ениқланғанлиқи йезилған икән.

Диларәниң һаммисиниң баян қилишичә, сақчилар җәсәт байқалған мәйдандики аяқ излири вә башқа гуманлиқ йип учрилириға асасән дәсләп мәһәллидики йеши 13 яштин юқири әрләрниң һәммисини тәкшүрүп қан әвришкилирини елип тәкшүргән. Нәтиҗидә икки кишини җинайәт гумандари дәп бекитип сорақ қилған, бу икки гумандарниң бири мәһәллидики давамлиқ иш терип йүридиған роһий кесили бар бир яш, йәнә бири болса давамлиқ хитайниң ичкири өлкилиригә кирип‏-чиқип туридиған 19 яшлиқ ишсиз, саватсиз бир яш болуп, бу дәл диларәниң там қошнисиниң оғли. Бир қанчә күн сорақтин кейин дәл бу диларәниң қошниси өзиниң диларәни өйигә йошуруп он нәччә күн қийниғанлиқини, ахири җансизлинип қалғанда соғуққа ташлап қойғанлиқини иқрар қилған.

Диларәниң делоси қатиллиқ дәп турғузулған. Диларәниң һаммисиниң бәргән учурлиридин мәлумки, диларә өзиниң мәһәллисидә йитип кәтти, өз қошниси тәрипидин булап кетилди, он нәччә күнләп өз өйиниң биқинида гөрүгә елинип кечә‏-күндүз қияс қилғусиз дәриҗидә хорлуқларға учриди вә йәнә шу өзи туғулуп чоң болған мәһәллисидә җан үзди, муздәк җәсити тепилди, бу арида һечким һечнемә сәзмигәндиму? бу мумкинму?

Бу биз тонугун топлуқ йезилиқ сақчиханиға қайта телефон қилип бу делониң паш қилиниш әһвали һәққидә мәлумат елишқа тиришқан болсақму,лекин сақчи тәрәп җаваб беришни рәт қилған иди. Бүгүнму йәнә телефон қилсақму лекин телефонға җаваб болмиди. Диларә оқуған топлуқ мәркизи башланғуч мәктәптики оқутқучила билән алақә бағлиғинимизда, улар, диларәниң бу ечинишлиқ паҗиәсидин интайин қайғурғанлиқини билдүргән болсиму, бу һәқтә гәп қилишқа җүрәт қилалмиди, уларниң ейтишичә, сақчи орунлири диларәниң җәсити тепилғандин кейин дәрһал мәктәптики икки йүз нәччә оқутқучи, оқуғучиларға йиғин ечип, уларни диларәниң делоси һәққидә һечқандақ артуқ сөз қилмаслиққа агаһландурған икән.

Диларәниң һаммиси, диларәниң йоқап кетип, қошнисиниң өйидә хорлуққа учрап җан үзгәнгә қәдәр бу җәрянда һечбир гуманлиқ шәпиниң билинмигәнликиниң сәвәби һәққидә, диларәни издәштә алди билән «адәм бедиклири қачурғанмикин» дегән гуман билән йеқин кишиләр вә йеқин даириниң көздин сақит қилинғанлиқи, йәнә бири даириләрниң йезидикиләрни қар тазилашқа йиғивалғанлиқи үчүн, йезида қерилар вә кичик балиларла қалғанлиқи, соғуқ қишта кишиләр көп талаға чиқмиғачқа кишиләрниң диққитиниму чәкмигәнлики, сақчиларниң болса муқимлиқ вәзийити үчүн вәзипә өтәватқан бир мәзгилгә тоғра кәлкәнликидәк сәвәбләрни көрсәтти.

Диларәниң һаммисиниң ейтишичә, диларәниң ахирәтлик ишлири түгигән. 8 яшлиқ бу нарисидигә зиянкәшлик қилған қатил 19 яшлиқ вәли турсун тутуп турулуватқан болсиму, әмма униң бу вәһший қатиллиқ делосиға техи сот ечилмиған. Диларәниң аилисидикиләр вә пүтүн йезидикиләр бу вәһший қатилниң тегишлик җазаға тартилишини күтүп турмақта икән.

Пикирләр (0)
Share
Толуқ бәт