Мал дохтур мәмәт ибраһимниң түрмидә өлгәнликини алақағидики мәһәллә башлиқлири дәлиллиди

Мухбиримиз шөһрәт һошур
2016-05-24
Share
urumchi-sheherlik-1-turme-2.jpg Үрүмчи шәһәрлик 1-түрмә. 2014-Йили 24-сентәбир, үрүмчи.
RFA

Шиветсийәдики шәрқи түркистан тәшвиқат мәркизи тәрипидин хәвәр қилинған куча алақағалиқ мал дохтур мәмәт ибраһимниң түрмидә өлгәнлики учури һәққидә алақаға сақчи хадимлири мәлумат бериштин өзини қачурған иди.

Бүгүн мухбиримизниң зияритини қобул қилған алақағаниң қанас вә қитат кәнтлиридики икки мәһәллә башлиқи мәмәт ибраһимниң түрмидә өлгәнликини дәлиллиди. Улар мәмәт ибраһимниң түрмидә өлгәнлики учуридин хәвәр тапқанлиқини билдүрүш билән бирликтә, мал дохтур мәмәт ибраһимниң аяли вә балилири барлиқини, ата-анисиниң техи һаят икәнликини билдүрди.

Алақаға сақчи хадимлири мал дохтур мәмәт ибраһимниң әһвали һәққидә мәлумат бериштин өзини қачурғандин кейин, биз мәмәт ибраһим тәвә болған қитат кәнти вә хизмәт орни тәвә болған қанас кәнтлиридин мәлумат елишқа урундуқ.

Бу икки кәнттики мәһәллә башлиқлиридин бири мәмәт ибраһимниң өлүмидин йәни униң түрмидә өлгәнликидин хәвири барлиқини ейтти, у йәнә мәмәт ибраһим билән тонушлуқи болсиму, әмма униң аилисигә нәзир яки өлүм пәтисигә баралмиғанлиқини, буниңға өзиниң хизмәттики алдирашлиқиниң сәвәб болғанлиқини әскәртти.

Әмма шәрқи түркистан тәшвиқат мәркизиниң бу һәқтики хәвиридә даириләрниң мәзкур аилини назарәт астиға елип әл-җамаәтниң бу аилини зиярәт қилишини чәклигәнлики тилға елинған.

Мәмәт ибраһим билән аилә бойичә барди-кәлди мунасивити бар болған йәнә бир мәһәллә башлиқиниң баян қилишичә, мәмәт ибраһимниң аяли вә балилири бар болуп, мәмәт ибраһим вапат болғандин кейин аяли тирикчилик еһтияҗи билән кәнттин йөткилип наһийә базириға көчкән.

Бу икки мәһәллә башлиқи мәмәт ибраһимниң түрмидә өлгәнликини ашкарилиған болсиму, әмма униң тутулуш, қолға елиниш вә сотлиниш җәряни һәққидә мәлумат бәрмиди.

Шәрқи түркистан тәшвиқат мәркизиниң хәвиридә баян қилинишичә, мал дохтур мәмәт ибраһим қол телефонида тәблиғ аңлиғанлиқи вә тәблиғни сақлиғанлиқи үчүн қанунсиз диний паалийәт билән шуғулланди дәп әйиблинип қолға елинған вә түрмидә қейин-қистақта һаятидин айрилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт