Атушта яридарни көтүргән җамаәт областлиқ һөкүмәткә қәдәр йүрүш қилған

Мухбиримиз шөһрәт һошур
2014.03.27
Share on WhatsApp
Share on WhatsApp
urumchi-xitay-saqchi-charlash.jpg Йәкән қатарлиқ районлардики хитай һөкүмитиниң бесимиға қарши вәқәләрдин кейин үрүмчиниң аманлиқ ишлири техиму күчәйтилгән. 2013-Йили 29-июн, үрүмчи.
AFP

Атушта 23-март күни йүз бәргән алаһидә сақчилар зораванлиқ вәқәси һәққидә мухбиримиз вәқә йүз бәргән тәвәликтики сақчиханиға телефон қилди. 1-Сақчихана хадими вә сақчихана башлиқи вәқәниң йүз бәргәнликини йошурди.

Әмма вәқәдә хитайниң алаһидә сақчилири тәрипидин чала өлүк қилинған ниҗат сәмәтниң аилиси, вәқә йүз бәргән күни 50-60 кишилик бир җамаәтниң бу һәқсизлиққа наразилиқ билдүрүш үчүн яридарни көтүрүп, областлиқ 1‏-дохтурханидин областлиқ һөкүмәткә қәдәр йүрүш қилғанлиқини ашкарилиди. яридар аилисиниң мәлум қилишичә, йүрүш кечә саәт бирдә йүз бәргән, җамаәт яридарниң хизмәт орнидики башлиқларниң тәрбийә вә вәдә бериши билән арқисиға чекингән.

Телефон зиярәтлиримиз давамида, атуш шәһәрлик сақчи идарисиниң хадими вә 1-сақчиханиниң башлиқи вәқә һәққидә мәлумат бериштин өзини қачурди. Әмма зиянкәшликкә учриған аилә вәқәгә қарита ялғуз өзлириниңла әмәс, вәқәни көргән-билгәнләрниңму қаттиқ ечинғанлиқини вә областлиқ һөкүмәткә қәдәр өзлири билән бирликтә йүрүш қилғанлиқини баян қилди. Вәқәниң җәрянини баштин ахири йәнә бир қетим аңлатқан сәмәт һаҗим бу қетимқи тәсиратини бундақ баян қилди:
-Мениң әң ечинидиғиним: баламни 2-сақчиханиға өзүм йетиләп апиришта, баламни қанун арқилиқ қоғдаймән дәп ойлиғантим, баламда гунаһ болса тутуп солап сотлайду, гунаһи болмиса, қандақ бир уқушмаслиқ болғинини маңа чүшәндүриду дәп ойлиғантим, алаһидә сақчиларниң баламни мениң көзүмниң алдида койза селип уруп тепип, нәгә апиридиғанлиқиниму дәп бәрмәй апқечип кетишини тәхмин қилмиғантим. Мана 4 күн болай деди, һөкүмәттин бир адәм келип, балаңни ма сәвәбтин урдуқ дегән адәм йоқ, балаң қандақ дегәнму адәм йоқ. Җәмийәттә кишиләр дәп йүргән “булар һөкүмәт әмәс, булаңчи, булар сақчи әмәс, қарақчи” дегән гәплиригә әмди ишәндим, мән бәкла дөт икәнмән, баламни чала өлүк қилип қойғичә билмәй йүрүптимән.

Юқирида йәкшәнбә күни атушта йүз бәргән хитай алаһидә сақчилириниң топлишип адәм уруш вәқәси һәққидә толуқлима мәлуматлар бәрдуқ. Мәлум болушичә, вәқә садир қилғучи алаһидә сақчилар хитай миллитидин, вәқәдә таяқ зәрбисидин чала өлүк қилинғучи уйғур, 21 яш, атуш шәһәрлик шәһәр башқуруш идарисиниң кадири.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.