Тоққузақ вә йеңишәһәрдики бир қисим йиғивелиш лагериниң орунлири ениқланди

Мухбиримиз шөһрәт һошур
2018-05-24
Share
yepiq-terbiyelesh-lagiri-yeqindin-tartilghan-xerite-3.jpg Кишилик һоқуқ вәзийити көзәткүчиси, җаң шав исимлик алий мәктәп оқуғучиси твитерда қәшқәр кона шәһәрдики йиғивелиш лагери дәп көрсәткән хәритиси.
Social Media/Shown Zhang

Твиттер учурида қәшқәрниң тоққузақ вә йеңи шәһәр наһийәсидики 3 йиғивелиш лагериниң орни көрситип берилди.

Шөһрәт

Хитай даирилири уйғур районидики йиғивелиш лагерлириниң мәвҗутлуқини инкар қилип туруватқан бир мәзгилдә, мустәқил көзәткүчиләр, хитай торлирида сақлинип қалған учурларға асасән бир қисим лагерларниң орини тепип чиқти. Канадалиқ яш көзәткүчи җаң шавниң әң йеқинқи твиттер учурида қәшқәрниң тоққузақ вә йеңи шәһәр наһийәсидики 3 йиғивелиш лагериниң орни көрситип берилди. Мухбиримизниң илгирики ениқлиши давамида тоққузақниң булақсу вә зәмин йезилиридин лагерға әкитилгәнләрниң әң көплүки айдиңлашқан иди.

Канадалиқ мустәқил яш көзәткүчи җаң шав тәрипидин твиттерда ашкариланған әң йеқинқи учурдин мәлум болушичә, тоққузақтики йиғивелиш лагерлиридин бири тоққузақ базар ичидики ишләмчи кочисиға селинған, лагерниң орни ишләмчи кочисидики йеңи қамақханиниң арқисиға тоғра кәлгән. Бу лагерниң қачан тәсис қилинғанлиқи мәлум әмәс, әмма хитайчә "шинҗаң иқтисад гезити" дә бултур 26- апрел чиққан бир қурулуш һөддигәрлик еланида бу лагерниң кеңәйтилидиғанлиқи, көлими әслидики 26 миң 855 квадрат метирдин 35 миң квадрат метирға чиқирилидиғанлиқи баян қилинған. Қурулушниң қануни вәкили тоққузақ наһийәлик әдлийә идариси болған. Қурулуш һөддигәрлик елани шинҗаң қурулуш түрлирини башқуруш вә мәслиһәт бериш ширкити тәрипидин базарға селинған.

Көзәткүчи җаң шавниң сүний һәмраһ хәритисидин көзитишичә, бу қурулуш бултур май ейиниң бешида башланған, ноябирниң ахири тамамланған. Һөддигәрлик еланидин мәлум болушичә, бу қурулушқа даириләр "тоққузақ наһийәлик қанун-түзүм билән тәрбийәләп өзгәртиш мәктипи" дәп нам бәргән.

Көзәткүчи җаң шавниң йәнә ениқлап чиқишичә, тоққузақ наһийәси бу йил 6-март күни "сағламлиқ мәркизи" намидики йәнә бир қурулушниң һөддигәрлик еланини бәргән. Еланда гәрчә буниң бир йиғивелиш лагери икәнлики очуқ дейилмигән болсиму, елан тоққузақ наһийәлик кәспий техника тәрбийәләш мәркәзлирини башқуруш идариси тәрипидин чиқирилған. Еланда қурулушниң орни ишләмчи кочисидики тәрбийәләш мәркизи билән йеңи қамақхана арисида көрситилгән.

Илгири тоққузақтин әһвал игилигән вақтимизда, тоққузақниң булақсу йезисидинла 3214 кишиниң түрмә вә лагерда икәнлики, булақсу йезилиқ әдлийә хадимлири тәрипидин ашкариланған. Әйни чағда хадимлар, булақсудин һәр һәптиси 50 дин артуқ кишиниң лагерларға йоллиниватқанлиқини паш қилған болсиму, әмма орнини дәп берилмигән иди.

Көзәткүчи җаң шавниң бу қетимқи твиттер учуридин йәнә мәлум болушичә, қәшқәр йеңи шәһәр наһийәсидики йиғивелиш лагерлиридин бири барин йезисиниң13 ‏- кәнтигә йәни арақечичи кәнтигә тәсис қилинған. Бу қурулушниң һөддигәрлик елани бултур 21-июн чиқирилған. Елан қәшқәр вилайәтлик қурулуш идарисиниң тор бекитидә елан қилинған. Сүний һәмраһ хәритисидин аян болушичә, қурулуш таки бу йил февралға қәдәр башланмиған. Бу йил апрелниң ахири қурулушниң көп қисми тамамланған. Бу лагерға адәм йиғишниң башланған яки башланмиғанлиқи һазирчә мәлум әмәс.

Биз өткән айларда қәшқәр шәһәр часа аманлиқ мудирини зиярәт қилған вақтимизда, у қәшқәр шәһиридики йиғивелиш лагерлири, вилайәт бойичә лагерға әң көп адәм топланған йеза базарлар һәққидә мәлумат бәргән, әмма йеңишәһәрдики лагерлар һәққидә мәлумат бәк көп берәлмигән иди.

Юқирида қәшқәрниң тоққузақ вә йеңи шәһәр наһийәсидики 3 йиғивелиш лагериниң орниниң ениқланғанлиқи һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт