Афғанистандики президентлиқ сайлими аяқлашти

Афғанистанда талибан һакимийити ағдурулғандин кейин елип берилған иккинчи қетимлиқ президентлиқ сайлимиға биләт ташлаш бүгүн аяқлашти. Әтигән саәт 7 дә башланған биләт ташлаш ахшам саәт 5 әтрапида аяқлашти.
Мухбиримиз ирадә
2009.08.20
Share on WhatsApp
Share on WhatsApp

Сайлам күни сайламниң асаслиқ риқабәтчилири болған хамит карзаи сайламниң тенчлиқ, тәрәққият вә афған хәлқиниң мәнпәти үчүн хәйирлик болушини тилиди. Сайламниң йәнә бир риқабәтчиси абдуллаһ абдуллаһ бу сайламниң афған хәлқи үчүн йеңи бир башланғуч болушини үмид қилидиғанлиқини баян қилди.

Гәрчә рәсмий даириләр қанчилик кишиниң биләт ташлиғанлиқи һәққидә техи ениқ бир рәқәм бәрмигән болсиму, әмма сайламни көзәткүчиләр вә у йәрдики чәтәллик мухбирлар бу қетимлиқ сайламда биләт ташлиғучиларниң саниниң көп әмәсликини, 2004 - йилидики биләт ташлиғучилардинму аз болуши мумкинликини илгири сүрүшмәктә.

Буниң сәвәби талибанларниң сайламдин бурун елип барған бир қатар зораванлиқ һәрикәтлири болуп, талибан сайламда биләт ташлиғучиларниң бармиқини кесиш билән тәһдит қилған иди. Болупму талибанлар бир қәдәр күчлүк болған җәнубий районларда биләт ташлаш орунлирида кишиләрниң нисбәтән аз болғанлиқи диққәт тартти.

Сайлам күни афған вә нато әскиридин болуп 300 миң әтрапида әскәр бихәтәрликни қоғдиди. Шундақтиму пайтәхт каболдики қораллиқ тоқунуш билән бирликтә, сайлам күни 70 қетимға йеқин қораллиқ һуҗум мәйданға кәлгән. Әмма мутәхәссисиләр мәйли немила болсун, бу сайламниң афғанистанниң келәчики үчүн муһим әһмийәткә игә икәнликини ипадә қилишмақта.

Бу қетимлиқ сайламниң рәсмий нәтиҗисиниң 17 - синтәбир күни елан қилинидиғанлиқи тәхмин қилинмақта. 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.