ئامېرىكىدىكى ئۇيغۇرلار يېڭى يىلنى بىرگە كۈتۈۋالدى

كېچىلىكنى مەركىزى ۋاشىنگىتوندىكى ئامېرىكا ئۇيغۇر جەمئىيىتى ئۇيۇشتۇرغان بولۇپ، كېچىلىكنىڭ باشلىنىشىدا دۇنيا ئۇيغۇر قۇرۇلتىيىنىڭ رەئىسى رابىيە قادىر خانىم سۆزگە تەكلىپ قىلىندى. ئۇ، ئامېرىكىدىكى ئۇيغۇرلار شۇنداقلا ۋەتەن ئىچى ‏ - سىرتىدىكى ئۇيغۇر خەلقىنىڭ يېڭى يىلىنى تەبرىكلەيدىغانلىقىنى، 2009 ‏ - يىلنىڭ ئۇيغۇرلار ئۈچۈن خەيرلىك بىر يىل بولۇپ قېلىشىنى ئۈمىد قىلىدىغانلىقىنى بىلدۈردى.

كېچىلىك پائالىيەت جەريانىدا مېھمانلار مىللىي تائاملارغا ئېغىز تېگىپلا قالماي، مىللىي ناخشا، مۇزىكىلارنى شۇنداقلا خالىسانە گۇرۇپپىلارنىڭ ئورۇنلىشىدىكى " تەنلىرىم ياپراق"، " بىزنىڭ مارشىمىز" دېگەن كوللىكتىپ ناخشا ۋە مارشلارنى ئاڭلىدى ھەمدە ئۇسۇل ئوينىدى.

ئامېرىكا ئۇيغۇر جەمئىيىتى يېڭى يىل كېچىلىكى ھەققىدىكى ئۇقتۇرۇشىدا يېڭى يىلنى "قېرىنداشلارنىڭ ئۈز ‏ - ئارا ئۇچرىشىپ، بىرگە تەنتەنە قىلىدىغان ياخشى پۇرسەت " دەپ تەكىتلىگەن.

يېڭى يىل كېچىلىكى ئۆتكۈزۈش ئىسلام ئەللىرىدىكى ئۇيغۇر مۇھاجىرلار ئارىسىدا بەك ئومۇملاشمىغان بىر پائالىيەت بولسىمۇ، لېكىن غەرب ئەللىرىدىكى ئۇيغۇرلار ئارىسىدا ئۆز ‏ - ئارا ئۇچرىشىپ، دىدارلىشىدىغان ۋە مۇڭدىشىدىغان ياخشى پۇرسەت، دەپ قارىلىدۇ.

ۋاشىنگتون ۋاقتى بىلەن سائەت 7:00 لەردە باشلانغان كېچىلىك ئەتىسى تاڭ سەھەر سائەت 1:00 گە قەدەر داۋام قىلدى.