بېرما 2000 دىن ئارتۇق كىشىنى قارا تىزىملىكتىن ئۆچۈرگەنلىكىنى جاكارلىدى

ئىگىلىنىشىچە، قارا تىزىملىكتىن ئۆچۈرۈلگەن كىشىلەرنىڭ ئىچىدە تونۇلغان سىياسەتچىلەر، كىشىلىك ھوقۇق ئاكتىپلىرى، چەتئەللىك تەتقىقاتچى، پروفېسسورلار، يازغۇچىلار، مۇخبىرلار بار بولۇپ، تىزىملىكتە يەنە، سابىق ئامېرىكا دۆلەت ئىشلىرى مىنىستىرى مادېليىن ئالبرايىت خانىم، داڭلىق بېرمىلىق ئۆكتىچى ئاڭساڭ سۇچىنىڭ ئوغلى ۋە شۇنداقلا فىلىپپىن پرېزىدېنتى كورازون ۋە ئامېرىكىلىق ناخشىچى سونىي بونوغا ئوخشاش تونۇلغان ئىسىملارمۇ بار.

بېرما پرېزىدېنتى رەسمىي تور بېتىدە ئېلان قىلىنغان مەزكۇر ئۇقتۇرۇشتا، چەتئەللەردە سۈرگۈندە ياشاۋاتقان بېرمىلىقلارنىڭ قايتىپ كېلىشىگە رۇخسەت قىلىنىدىغانلىقى بىلدۈرۈلگەن. بېرما ھۆكۈمىتىنىڭ بۇ قارارى كۆزەتكۈچىلەرنى ھەيران قالدۇرغان يەنە بىر قەدەم بولدى. چۈنكى، بېرما ھۆكۈمىتى يېقىندىن بۇيان تۈزۈمىدە ئۆزگىرىشلەرنى ئېلىپ بېرىپ، نامايىش قىلىشنى قانۇنلاشتۇرغان، ئاخبارات ساھەسىدىكى كونترولنى ئازايتقان ۋە بىر قىسىم سىياسىي مەھبۇسلارنى تۈرمىدىن ئازاد قىلغان ئىدى.

بېرما ھۆكۈمىتىنىڭ بۇ ئىجابىي يۆنىلىشى غەرب دېموكراتىك ئەللىرىنىڭ قارشى ئېلىشىغا ئېرىشمەكتە. ئامېرىكا بۇندىن ئاۋۋال، بېرما ئەگەر مۇشۇنداق دېموكراتىيىلىشىشكە قاراپ ماڭسا، ئامېرىكىنىڭ بېرمىنى ھەر جەھەتتىن قوللاشقا تەييارلىقىنى بىلدۈرگەن ئىدى.