Bo shileyning axirqi wezipisidin élip tashlinishi jiddiy inkas qozghidi

Sabiq chungching sheher bashliqi bo shileyning 10-aprél küni axirqi wezipisi siyasiy byuro ezaliq salahiyitidin élip tashlinishi bügün xelq'ara metbu'atlarning qiziq nuqtisigha aylandi.
Muxbirimiz méhriban
2012.04.10

Bu xewer eng awwal roytérs agéntliqi teripidin bérilgen bolup, xewerde bayan qilinishiche, xitay merkizi hökümiti 10-aprél küni chüshtin kéyin, xitaydiki nahiyidin yuqiri derijilik emeldarlirigha uqturush chiqirip, 15-mart küni chungching sheher bashliqliq wezipisidin qaldurulghan xitay siyasiy byuro ezasi bo shileyning éghir xataliqi seweblik, siyasiy byuro ezaliq salahiyitiningmu élip tashlan'ghanliqini élan qilghan.

Amérika awazi radi'osining bu heqtiki xewiride bo shileyning ayali gu keyleyning en'gliyilik sodiger né'il xeywodning sirliq ölümide qestlep öltürüsh jinayiti sadir qilghan dégen guman bilen qanun organlirining tekshürüshige tapshurup bérilgenlikimu xewer qilindi.

Bo shiley yéqinqi yillardin buyan xitayda wezipisidin qaldurulghan yuqiri derijilik emeldarlardin biri. Amérika awazi radi'osining bügünki xewiride yene bo shileyning wezipisidin qaldurulush jeryanidiki chong ishlar xatirisi élan qilin'ghan.

Uningda bo shiley teripidin 2012-yili 1-féwral küni wezipisidin élip tashlan'ghan chungching sheherlik saqchi idarisining mongghul millitidin bolghan bashliqi wang lijün hem uning 6-féwral küni amérikining chéngdudiki konsulxanisidin yardem telep qilish weqesi, 3-ayda béyjingda échilghan ikki qurultay hem qurultaydin kéyin xitay bash ministiri wén jyabawning wang lijün weqesi heqqide toxtilip, bo shiley qatarliq chungching emeldarlirini tenqidligenliki qatarliq weqeler arxiplashturulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.