Уйғурларниң полат әләмдар билән болған учришиши уйғур тор бәтлириниң қизиқ темисиға айланди

Түркийиниң атақлиқ кино чолпини«бөриләр вадиси» филимдә баш рол елип, полат әләмдар нами билән көрәрмәнләр арисида чоңқур тәсират қалдурған ниҗат шашмасниң 21 - июл күни истамбулда уйғур елидин кәлгән вә түркийә яшайдиған 150 уйғурни қобул қилип, улар билән төт саәт әтрапида биргә болуши уйғурлар арисида күчлүк иҗабий тәсиратларни қозғиған иди.
Мухбиримиз үмидвар
2012-07-29
Елхәт
Пикир
Share
Принт


Мәлум болушичә, мәзкур уйғурларниң полат әләмдар билән болған учришиши нөвәттә, уйғур елидики интернет тор бәтлириниң әң қизиқ темисиға айланған.

Уйғурларниң полат әләмдар билән болған учришишиға аит фото сүрәт көрүнүшлири һәмдә учришиш әһвалиға аит қисқичә мәлуматлар бир қанчә күн ичидила нәччә он миңлап оқулуш вә көрүлүшкә еришкән.

Мәлум болушичә, хитай һөкүмити тунҗи қетим мундақ 130 дин артуқ әдәбият, сәнәт, кино, музика вә башқа саһәләрдики уйғурларни коллектип һалда түркийигә берип, түркийиниң атақлиқ кино чолпини билән көрүшүш вә бирликтә паалийәт елип беришқа рухсәт қилған.

Интернет тор бәтлиридики полат әләмдар билән болған бу қетимқи учришиш һәққидики инкаслар наһайити йүксәк баһалар билән толған болуп, буларда уйғурларниң мәзкур әртисқа болған һөрмити вә түркийә хәлқиғә болған достанилиқ ипадиләнгән.

Мәлум болушичә, илгири нурғун уйғурлар, хитай, хоңкоң, япон, һиндистан вә пакистан һәтта корийиниң даңлиқ кино әртислирини әтивалиған иди, мана әмди түркийә чолпанлири, түркийә филимлири җүмлидин полат әләмдар уйғурларниң қәлбидин орун алғанлиқи инкас қилинмақта.

Пикирләр (0)
Share
Толуқ бәт