Чегрисиз мухбирлар тәшкилати франсийә һөкүмитини хитайдин лю шавбони қоюп беришни тәләп қилишқа чақирди

Мәркизи париждики чегрисиз мухбирлар тәшкилати җүмә күни баянат елан қилип, франсийә даирилириниң, парижда зиярәттики хитай дөләт рәиси ху җинтавниң өтәр йолида намайиш қилмақчи болған бир қисим кишилик һоқуқ паалийәтчилирини тутқун қилғанлиқини әйиблиди вә шундақла франсийә һөкүмитини ху җинтавдин хитай түрмисидики нобил тинчлиқ мукапати саһиби лю шавбони қоюш беришни тәләп қилишқа чақирди.
Мухбиримиз әркин
2010-11-05
Елхәт
Пикир
Share
Принт

Баянатта чегрисиз мухбирлар тәшкилатиниң баш катипи җейн франшиос җуллиярдниң сөзини нәқил кәлтүрүп, "кишилик һоқуқ дөлити франсийиниң хитай өктичилириниң әһвали вә демократийә тәрәпдарлириниң системилиқ бастурулушиға зуван сүрмәсликини тәсәввур қилғили болмайду. Президент саркозий 2007‏ - йилдики сайламда кишилик һоқуқни франсийә ташқи сияситиниң мәркизигә олтурғузуш тоғрисидики вәдисигә қандақ йүз келиду?" дәп тәкитлигән.

Франсийә сақчилири җүмә күни әтигәндә париждики намсиз әскәрләр қәбристанлиқини зиярәт қилишқа маңған ху җинтавниң өтәр йолида намайиш қилип, лю шавбони қоюп беришни тәләп қилмақчи болған бир қисим чегрисиз мухбирлар тәшкилати әзалирини тутқун қилған. Шуниң билән биргә йәнә, парижниң франкилин розвелт метро истансисида намайиш қилған 20 дәк чегрисиз мухбирлар тәшкилати әзалири вә бир нәпәр франсийә қанал плос телевизийисиниң мухбири тутуп қелинған иди.

Чегрисиз мухбирлар тәшкилати баянатта лю шавбониң чоқум қоюп берилиши шәрт икәнликини, франсийә һөкүмити чоқум ху җинтавдин лю шавбони қоюп беришни тәләп қилиши керәкликини тәкитлигән. Лекин хитайниң муавин ташқи ишлар министири фу йиң пәйшәнбә күни саркозий билән ху җинтав еллисе сарийида көрүшкәндин кейин мухбирларға баянат берип, "лю шавбо мәсилисиниң ху җинтав билән саркозий арисидики сөһбәттә музакирә қилинмиғанлиқи"ни билдүргән.

Пикирләр (0)
Share
Толуқ бәт