Xitay da'iriliri “Chén shitong bilen söhbetler” namliq kitabni neshrdin toxtitishqa urun'ghan bolsimu, muweppeq bolalmighan

Xitay da'iriliri “Chén shitong bilen söhbetler” namliq kitabning xongkongda neshr qilinishini tosushqa urun'ghan bolsimu, biraq muweppeq bolalmighan.
Muxbirimiz erkin
2012.06.01
Share on WhatsApp
Share on WhatsApp

Chén shitong tiyen'enmén oqughuchilar herikiti basturulghan 1989‏-yili béyjing shehirining partkom sékrétari we merkizi komitét siyasiyning byurosining ezasi idi. U tyen'enmén weqesining basturulushini aktip qollighan shexslerning biri, dep qarilip kelgen. Biraq u tiyen'enmén weqesi basturulup bir mezgildin kéyin, xiyanetchilik bilen eyiblinip on nechche yilliq qamaq jazasigha höküm qilin'ghan.

Biraq chén shitong yazghuchi yaw jyenfu bilen ötküzgen söhbitide özining xiyanetchilik qilghanliqini ret qilip, özining qurban qilin'ghanliqini ilgiri sürgen. Yazghuchi yaw jyenfu uning bilen ötküzgen söhbitini kitablashturup, “Chén shitong bilen söhbetler” namida neshrge teyyarlighan idi.

Birleshme agéntliqining xewer qilishiche, xitay da'iriliri mezkur kitab jüme küni neshr qilinishtin burun, eserning aptori yaw jyenfu bilen körüshüp, kitabni neshrdin qayturuwélishni, uning barliq ziyanlirini tölep béridighanliqini bildürgen. Biraq yazghuchi yaw jyenfu xitay terepning telipini ret qilghan.

Közetküchilerning ilgiri sürüshiche, 267 betlik mezkur kitab “4-Iyun weqesi” ning 23 yilliq harpisida we kompartiye rehberlik qatlimi almishish basquchida turuwatqan nazuk mezgilde neshr qilinip, xitay danilirini bi'aram qilghan.

Yazghuchi yaw jyenfuning ashkarilishiche, chén shitong eyni chaghda weqening di'alog arqiliq tinch hel qilinishida ümid barliqi, tyen'enmén qirghinchiliqidin saqlan'ghili bolidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.