Чилидики йәр тәврәшниң зийини еғир болмақта

Хәвәрләрдин мәлум болушичә, 27 - феврал күни чилида йүз бәргән 8.8 Бал дәриҗидики йәр тәврәштә икки милйон адәм апәткә учриған болуп, бүгүнки хәвәрләрдә йәр тәврәштә өлгәнләр саниниң 700 дин ашқанлиқи мәлум болмақта.
Мухбиримиз миһрибан
2010-03-01
Share

Бирләшмә агентлиқиниң 1 - март күнидики хәвиридә көрситилишичә, бу қетимқи йәр тәврәштә чилиниң пайтәхти сантияго вә униң әтрапидики районларниң апәткә учраш дәриҗиси әң еғир болған. Бир милйон 500 миң еғиз өй өрүлгән, нурғун қурулуш вә санаәт әслиһәлири вәйран болған. Електир вә алақә линийилири пүтүнләй үзүлгән, су тохтиған. Һазирғичә апәттә өлгәнләрниң сани 700 дин ашқан болуп, бу сан йәнә давамлиқ ешиши мумкин икән.

Бүгүнки хәвәрләрдин мәлум болушичә, чилидики йәр тәврәштин кейин, 28 - феврал күни тинч окянниң ғәрбий деңиз тәвәсидә деңиз долқунлири туюқсиз көтүрүлүш нәтиҗисидә, испанийә, португалийә,франсийә қатарлиқ дөләтләрниң деңиз бойи районлирида еғир деңиз борини вә деңиз ташқини йүз берип, аз дегәндә 50 адәм һаятидин айрилған, 100 лигән адәм яриланған, бир милйондин артуқ аһалиниң токи тохтап қалған. Франсийиниң деңиз борининиң апитигә учраш әһвали бир қәдәр еғир болуп, париж айродромидики айропиланларниң 100 қетимдин артуқ учуш нөвити тохтитилған. Франсийиниң ғәрбий қирғақ деңиз бойида 45 адәм деңиз боринида қаза қилған.

Чилидики йәр тәврәш 2010 - йили 12 - январ күни һайтида йүз бәргән 7 бал йәр тәврәштин кейинки йәнә бир нөвәтлик еғир дәриҗидики йәр тәврәш һадисиси болуп, һайтидики йәр тәврәштә 150 миң адәмниң һаятидин айрилғанлиқи хәвәр қилинған иди. Нөвәттә, пүтүн дуня бойичә чилидики йәр тәврәштә апәткә учриғанларға ярдәм бериш һәрикәтлири елип берилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт