Bayanatchi dilshat rishit Uyghur oqughuchilirigha qaritilghan diniy cheklimilerni eyiblidi

Dilshat rishit dunya Uyghur qurultiyi yéqinda ghuljidin igiligen ehwallarni bayan qilip, ghulja nahiye dolan déhqanchiliq meydani ottura mektipining 2013-yili 10-yanwar qishliq tetil harpisida oqughuchilar we ularning ata-anilirini “Oqughuchilarning din'gha étiqad qilmasliq, meschitlerge kirmeslik ehdinamisi”ge qol qoyushqa mejburlash qilmishining xitay özi élan qilghan puqralarning din'gha étiqad qilish erkinliki heqqidiki qanuniy belgilimilerge xilap qilmish ikenlikini tekitlep, da'irilerning bu qilmishining Uyghurlarni dinsizlashturush siyasitining yalingach ipadisi ikenlikini tekitlidi.

Ghulja nahiye dolan déhqanchiliq meydani ottura mektipi oqughuchilar bashqarmisi 10-yanwar küni qishliq tetil harpisida oqughuchilargha 10 maddiliq ehdiname tarqitip, ata-anilardin bu ehdinamige qol qoyushni telep qilghan. Radi'omiz tapshuruwalghan ehdinamining esli nusxisida bayan qilinishiche, ata-anilarni oqughuchilarning qishliq tetil mezgilide we uningdin kéyinki mezgilde bu ehdinamide belgilen'gen, namaz oqumasliq, meschitke kirmeslik, diniy tüs alghan kiyimlerni kiymeslik, roza tutmasliq, qur'an oqumasliq, yer asti diniy mekteplerde telim almasliq, milletler ittipaqliqigha xilap qilmishlarda bolmasliq, ösek söz tarqatmasliqqa kapaletlik qilish telep qilin'ghan.

Ehdinamide yene ata-anilar agahlandurulup, ehdinamidiki belgilimilerge xilapliq qilghuchilarning qilmishining éghir-yéniklikige qarita jerimane qoyulidighanliqi, hetta qanuniy jawabkarliqqa tartilidighanliqimu uqturulghan.