Диний мәһбус ярмәмәт тудахунниң әһвалидин аилиси 2 йил хәвәрсиз қалған

Нөвәттә, шихудики бир түрмидә қамақлиқ ярмәмәт тудахун буниңдин 5 йил аввал аталмиш“қанунсиз диний күчләргә иқтисадий ярдәм қилған” дегән әйибләш билән қолға елинип қамақ җазасиға һөкүм қилинған.

Ярмәмәтниң қамақ җазаси бу йил 9-айда тошиду. Бирақ униң аилиси 2 йил аввал түрмигә берип йоқлап кәлгәндин буян, униңдин һечқандақ хәвәр алалмиған. ярмәмәтниң аялиниң ейтип беришичә, у ери қолға елинғандин кейин 3 пәрзәнти билән йөләнчүксиз қелип, хәқләрниң кир-қетини ююш, ненини йеқиш қатарлиқ ишлар билән тирикчилик қилип кәлгән. У, ериниң бурун өпкә яллуғи барлиқини, 2 йил аввал уни йоқлап барғанда униң оруқлап бир тирә, бир устихан болуп қалғанлиқи, шуңа ериниң сақ-саламәт чиқишини әндишә иликидә күтүватқанлиқини билдүрди.

Хитай даирилири“ 11‏-сентәбир вәқәси” дин кейин, уйғур елидә сиясий өктичиләр, мустәқиллиқ пикридики уйғурларни, диний затлар вә диний паалийәтләрни қаттиқ бастурушқа башлиған. Ғулҗида сақал қойған уйғурларни “йошурун тәһдит” дәп қарап бастурған иди.

Ярмәмәт тудахун 2007‏-йили бир ропаш аялға пул ярдәм қилғанлиқи үчүн қолға елинип, аталмиш “қанунсиз диний күчләргә ярдәм қилған” дегән әйибләш билән қамаққа һөкүм қилинған.