Америка дөләт ишлири муавин министири роберт бләйк оттура асияда зиярәттә болди

Америка дөләт ишлири министирлиқиниң оттура асия ишлириға мәсул муавин министири роберт бләйк түркмәнистан вә қирғизистанда 2 күнлүк рәсмий зиярәттә болди.
Мухбиримиз ирадә
2013.01.17

Зияритини алди билән түркмәнистандин башлиған бләйк сәйшәнбә күни пайтәхт ашхабатта түркмән һөкүмәт әмәлдарлири билән учрашқан. Тәрәпләр учришишта икки дөләтниң енергийә вә сода һәмкарлиқини ашуруш, мәбләғ селиш, кишилик һоқуқ вә район хәвпсизлики қатарлиқ мәсилиләрдә пикир алмаштурған.

Бләйк чаршәнбә күни қирғизистанға йетип кәлгән. Икки тәрәп бу йәрдә америка вә қирғизистанниң район хәвпсизлики вә муқимлиқи, демократийә вә қанунниң үстүнлүкини ишқа ашуруш, кишилик һоқуқ, енергийә, маарип, мәдәнийәт вә сода алақисини ашурушқа алақидар бир қатар муһим темиларда музакирә елип барған.

Бләйк районға қаратқан зияритини башлаштин аввал мухбирларға бәргән баянатида, қирғизистанға қилған зияритидә асаслиқ манас һәрбий транст мәркизини ишлитиш вақтини узартиш мәсилисини музакирә қилидиғанлиқини ейтқан. Әмма қирғиз ахбарат васитилири, президент алмасбек атамбайефниң роберт биләйк билән учрашқанда 2014-йилидин кейин манас айродроминиң аммиви айродромға өзгәртилидиғанлиқини ейтқанлиқини хәвәр қилған.

Америка муавин ташқи ишлар министири қирғизистанда қилған сөзидә, манас һәрбий базисиниң америка үчүн муһим истратегийилик әһмийәткә игә икәнликини тәкитләш билән биргә, “оттура асия дөләтлириниң һәммиси дегүдәк америкиниң районда техиму чоң рол елишини арзу қилиду” дегән. Көзәткүчиләр манас һәрбий транст мәркизи мәсилисиниң йәнила америка-қирғизистан арисидики муһим мәсилә икәнликини пәрәз қилишмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.