Amérika dölet ishliri mu'awin ministiri robért bleyk ottura asiyada ziyarette boldi

Ziyaritini aldi bilen türkmenistandin bashlighan bleyk seyshenbe küni paytext ashxabatta türkmen hökümet emeldarliri bilen uchrashqan. Terepler uchrishishta ikki döletning énérgiye we soda hemkarliqini ashurush, meblegh sélish, kishilik hoquq we rayon xewpsizliki qatarliq mesililerde pikir almashturghan.

Bleyk charshenbe küni qirghizistan'gha yétip kelgen. Ikki terep bu yerde amérika we qirghizistanning rayon xewpsizliki we muqimliqi, démokratiye we qanunning üstünlükini ishqa ashurush, kishilik hoquq, énérgiye, ma'arip, medeniyet we soda alaqisini ashurushqa alaqidar bir qatar muhim témilarda muzakire élip barghan.

Bleyk rayon'gha qaratqan ziyaritini bashlashtin awwal muxbirlargha bergen bayanatida, qirghizistan'gha qilghan ziyaritide asasliq manas herbiy transt merkizini ishlitish waqtini uzartish mesilisini muzakire qilidighanliqini éytqan. Emma qirghiz axbarat wasitiliri, prézidént almasbék atambayéfning robért bileyk bilen uchrashqanda 2014-yilidin kéyin manas ayrodromining ammiwi ayrodromgha özgertilidighanliqini éytqanliqini xewer qilghan.

Amérika mu'awin tashqi ishlar ministiri qirghizistanda qilghan sözide, manas herbiy bazisining amérika üchün muhim istratégiyilik ehmiyetke ige ikenlikini tekitlesh bilen birge, “Ottura asiya döletlirining hemmisi dégüdek amérikining rayonda téximu chong rol élishini arzu qilidu” dégen. Közetküchiler manas herbiy transt merkizi mesilisining yenila amérika-qirghizistan arisidiki muhim mesile ikenlikini perez qilishmaqta.