Америка дөләт мәҗлиси рәһбәрлири далай лама билән көрүшүп, уни қоллайдиғанлиқини билдүрди

Америка дөләт мәҗлиси авам палата рәһбәрлири пәйшәнбә күни америка пайтәхти вашингтонни зиярәт қиливатқан тибәт роһаний даһийси далай лама билән көрүшүп, уни қоллайдиғанлиқини билдүргән.
Мухбиримиз әркин
2011.07.08
Share on WhatsApp
Share on WhatsApp

Далай лама пәйшәнбә күни авам палатасиниң җумһурийәтчи рәиси җон бейнир, авам палата демократик аз санлиқлар рәһбири нәнси пәлуси вә бир палата әзалириниң күтүвелишиға еришкән.

Җон бейнир дөләт мәҗлисидики көрүшүштә далай ламани қоллайдиғанлиқини билдүрүп, далай ламаниң америка вә дуня үчүн бир өлгә икәнликини тәкитлигән.

Җон бейнирниң көрүшүштин кейин ахбарат васитилиригә ашкарилишичә, авам палата әзалири далай лама билән “бизниң қиммәт қаришимизниң ноқул тибәт вә хитай билән чәклинип қалмайдиғанлиқи, буниң оттура шәрқниму өз ичигә алидиғанлиқи” һәққидә сөзләшкән. Җон бейнир йәнә далай ламани махтап, униң “улар қобул қилған ортақ қиммәт қаришини һармай-талмай қоғлишиватқанлиқи” ни мәдһийилигән.

Лекин, буниңдин сәл бурун хитай һөкүмити америкини агаһландуруп, америка дөләт ишлар министирлиқиниң тибәт ишлар әмәлдари, ярдәмчи дөләт ишлар министири мариа отерониң алдинқи күни далай лама билән көрүшкәнликидин биарам болғанлиқини билдүргән һәм америка әмәлдарлириниң униң билән көрүшүштин йирақ турушни тәләп қилған иди. Далай лама вашингтонда 10 күндәк зиярәттә болиду.

Нөвәттә президент обама вә вә дөләти ишларминистири клинтон ханимниң униң билән көрүшидиған -көрүшмәйдиғанлиқи мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.