D u q xitayning bash'egim, alataw sheherlirini qurush pilanini tenqid qildi

D u q bayanatchisi dilshat rishitning ilgiri sürüshiche, bu pilan xitay köchmenlirining yenimu köplep orunlashturulup, yerlik xelqning dawamliq az sanliq orun'gha chüshüp qélishini éghirlashturup qalmaydu. Bu yene, Uyghurlardiki ishsizliqni köpeytip, muhitni, Uyghurlarning medeniyet turmush usulini ilgirilep buzghunchiliqqa uchritidu.

Axbarat wasitilirining xewer qilishiche, xitay dölet kabinéti yéqinda uqturush chüshürüp, Uyghur aptonom rayonidiki alataw we bash'egimni nahiye derijilik sheher qilip tesis qilish toghrisidiki iltimasini testiqlighan. Bash'egim shehiri Uyghur aptonom rayonining bashqurushida bolidighanliqini, alataw shehirini bortala mongghul aptonom oblasti bashquridighanliqini élan qilghan idi.

Dilshat rishitning bildürüshiche, xitayning ölchimige asaslan'ghanda nahiye derijilik bir sheherning nopusi az dégende 200 mingdin az bolmasliqi kérek. U, Uyghurlar topliship yashaydighan yeken, kucha qatarliq sheherlerning nahiye derijilik sheher bolushqa sherti toshsimu, biraq xitay bash'egim, alatawgha oxshash shertke toshmaydighan jaylarni sheher qilip qurushta, xitay nopusini bexiraman yötkeshni asasliq ölchem qilghan, dep körsetti.