Хитай даирилири сәнәткар әй вейвейни кепилгә қоюп бәргәнликини билдүрди

Бүгүн хәлқара мәтбуатлардиму бу йил 3-апрел күни хитай даирилири тәрипидин бейҗиң хәлқара айродромида қолға елинған әй вейвейниң кепилгә қоюп берилгәнлики һәққидики хәвәр дәлилләнди.

Бу йил 4-айниң 3-күни әй вейвей тутқун қилинғандин буян чәтәлләрдики хитай демократлири хоңкоң һәм дуняниң һәрқайси җайлирида үзлүксиз намайиш қилип хитай һөкүмитидин әй вейвейни қоюп беришни тәләп қилип кәлгән иди.

Хәлқара инсан һәқлири тәшкилатлири һәм ғәрб дөләтлириму әй вейвей мәсилисидә хитай һөкүмитини әйибләп кәлгән иди. Әмма хитай даирилири әй вейвейни иқтисадий җинайәт билән әйибләп тутқун қилғанлиқини билдүргән иди.

Бүгүн бейҗиң сақчи даирилири әй вейвейниң өз җинайитини тонуш позитсийисиниң яхши болғанлиқи һәм кесили болғини үчүн униң түрмә сиртида давалиниши үчүн кепилгә қоюп берилгәнликини билдүрди.

Әй вейвей өзиниң сәнәт әсәрлири арқилиқ хитай һөкүмәт даирилирини тәнқидләп келиватқан өктичиләрниң бири иди. Шуңа у йеқинқи бирнәччә йилдин буян, хитай даирилири тәрипидин сәзгүр шәхсләр қатарида муамилә қилинип, униң паалийәтлири чәклимигә учрап кәлгән иди.