ئۇچتۇرپاندىكى بىر ھاراق زاۋۇتىدا پارتلاش يۈز بېرىپ، ئىككى ئادەم ئۆلگەن

خەۋەردە، پارتلاشنىڭ ئوت كېتىپ كېلىپ چىققانلىقى ئىلگىرى سۈرۈلگەن بولسىمۇ، لېكىن ۋەقەدە ئۆلگەن ئىككى كىشىنىڭ كىملىكى، مىللەت تەۋەلىكى تىلغا ئېلىنمىغان.

شىنخۇا ئاگېنتلىقىنىڭ ئىلگىرى سۈرۈشىچە، ۋەقە يۈز بەرگەندىن كېيىن، ئوت ئۆچۈرۈش ئەترىتى دەرھال نەق مەيدانغا يېتىپ بارغان بولسىمۇ، بىراق ئوت ئاپىتى كېچە سائەت 8:00 ‏گىچە ئۆچۈرۈپ بولۇنمىغان.

قىزىل ھاراق زاۋۇتىدىكى پارتلاش، يېقىندا گۇمانلىق ئىككى ئۇيغۇر ياشنىڭ قاغىلىق ناھىيىسىنىڭ چاسامەسچىت يېزىسى، كۆككۆۋرۈك، دېگەن يېرىدىكى خىتاي چېگرا مۇداپىئە قىسىملىرىنىڭ گازارمىسىغا ھۇجۇم قىلىپ، كىشىلەرنىڭ دىققىتى يەنە بىر قېتىم بۇ رايونغا بۇرالغان بىر پەيتتە يۈز بەرگەن.

بۇنىڭدىن سەل بۇرۇن خىتاي ئاخبارات ئورگانلىرى خەۋەر ئېلان قىلىپ، ئۇيغۇر ئېلىدىكى نېفىت، تەبىئىي گاز ۋە باشقا ئىشلەپچىقىرىش ئورۇنلىرىنىڭ بىخەتەرلىكىگە كاپالەتلىك قىلىشنى تەلەپ قىلغان ئىدى.

شىنخۇا ئاخبارات ئاگېنتلىقىنىڭ ئىلگىرى سۈرۈشىچە، ئۇچتۇرپان «تۆمۈر چوققا» قىزىل ھاراق زاۋۇتىدا يۈز بەرگەن ئوت ئاپىتى ۋە پارتلاشنىڭ سەۋەبى تېخى ئېنىقلانمىغان. خەۋەردە مۇناسىۋەتلىك ئورۇنلارنىڭ ۋەقەنىڭ سەۋەبىنى تەكشۈرۈۋاتقانلىقىنى بىلدۈرگەن.