Илһам тохти: хитайлар билән уйғурлар арисидики өчмәнлик чоңқурлишиватиду

Бейҗиң мәркизи милләтләр университитиниң профессори, "уйғурбиз" тор бекитиниң саһиби илһам тохти үрүмчидә йүз бәргән хитай көчмәнлириниң намайишиға пикир билдүрүп, бу вәқә уйғурлар билән хитай арисидики өчмәнликниң чоңқурлашқанлиқини көрситидиғанлиқини, һөкүмәтниң чоқум шинҗаңдики сияситини тәртипкә селиши керәкликини билдүрди.
Мухбиримиз әркин
2009.09.04

Илһам тохти, әгәр һөкүмәт сияситини тәртипкә салмиса, өчмәнликниң техиму күчийидиғанлиқини, тоқунушниң пүтүн уйғур елигә кеңийиш еһтимали барлиқини агаһландурди.

Илһам тохти җүмә күни радиомиз гуаңдуң тили бөлүминиң зияритини қобул қилғанда агаһландуруп, "чүнки өчмәнлик йиғилип қалғанлиқтин, мениңчә һазир партлаш чекигә берип қалди. 5 ‏- Июл вәқәсидә немә ишларниң йүз бәргәнликини ташқи дуня билмәйду. Бу һәқтики пикирләр охшаш әмәс. Бундақ бир пәйттә,хәнзуларниң зор көләмлик намайиши йүз бәрди.

Һөкүмәтниң буниңға тутқан позитсийиси өткәнки бастурушқа охшимай қалди. Гәрчә яш аққузуш бомбиси атқан болсиму, лекин муамилә дәриҗиси охшимайтти. Мән көңлүмдә наһайити әндишә қилватимән. Адәттики урушларни бир тәрәп қилиш асан, лекин милләтләр оттурисидики өчмәнликни юмшитиш наһайити қийинға тохтайду" дәйду.

Илһам тохти йәнә, әгәр тоқунуш хотән, қәшқәр, ғулҗа, турпан, ақсу, корла вә қизилсуларға тарқалса бу райондики хитайларни палакәт басидиғанлиқини, лекин мәсилә аптоном район рәһбәрлириниң истипа бериши билән түгимәйдиғанлиқини, шуңа һөкүмәт һәр тәрәплимилик сияситини тәртипкә селиши керәкликини билдүрди.

5 ‏- Июл вәқәсидә уйғур аптоном райониниң рәиси нур бәкри илгири нур бәкрини "лаяқәтсиз" дәп тәнқидлигән илһам тохтини ашкара әйиблигән. Даириләр уни аилә нәзәрбәнтидә тутуп туруп, йеқинда қоюп бәргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.