Amérika jenubiy déngiz ixtilapni tinch yol bilen hel qilishqa chaqirdi

Ötken ayda xanoy da'iriliri xitay déngiz charlighuchilirining jenubiy déngizda néfit tekshürüwatqan bir wiyétnam kémisining qidirish kabélini késiwetkenlikini bildürgen idi.

Wiyétnam da'irilirining bildürüshiche, 9-iyun bir xitay béliqchi kémisi yene wiyétnamning néfit tekshürgüchi kémisige kélip soqulghan. Weqening ikki terep arisidiki jiddiylikni kücheytkenliki melum.

Bügün xitay dölet axbaratliri bash maqale élan qilip, manéwir mesiliside wiyétnamgha agahlandurush berdi.

Xitay “Yershari waqit” gézitide élan qilin'ghan bash maqalide wiyétnamning jenubiy déngiz mesilidiki qattiq pozitsiyisi, xitay jama'itining yaxshi könglige dekke bergenliki hemde buning xitay rehberlirini qattiq wasitilerni qollinishqa mejbur qilghanliqi körsitilgen.

Maqalide yene, tarixtin buyan yüz bergen térritoriye toqunushlirida wiyétnamning utturup kelgenliki ilgiri sürülgen.

Amérika dölet ishlar ministirliqi bayanatchisi mark tonér jüme künidiki bayanatida: biz jenubiy junggo déngizi heqqidiki bezi xewerlerdin bi'aram bolduq. Bularning hemmisi u yerdiki jiddiylikni ulghaytidu. Buning rayon bixeterliki we tinchliqigha héchqandaq paydisi yoq, dédi.

U yene, amérikining ikki terepni mesililerni diplomatik yol bilen hel qilishqa dewet qilidighanliqini bildürdi.

Amérika dölet mudapi'e ministiri robért géytis ötken hepte sin'gaporda échilghan muhakime yighinda mezkur déngizda amérikiningmu menpe'iti barliqi we oz ittipaqdashlirini qoghdaydighanliqini bildürgen idi.