خەلقئارا كەچۈرۈم تەشكىلاتى مەھبۇس كېرەم ئابدۇۋەلىنىڭ سالامەتلىك ئەھۋالى ھەققىدە چاقىرىقنامە ئېلان قىلدى

تەشكىلات چاقىرىقنامىسىدە كېرەم ئابدۇۋەلىنىڭ 9 ئاي داۋام قىلغان ئاچلىق ئېلان قىلىش ھەرىكىتى سەۋەبلىك تەن سالامەتلىكىنىڭ ئېغىر دەرىجىدە زەئىپلەشكەنلىكىنى ۋە نۆۋەتتە ئۇنىڭ ھاياتىي بىخەتەرلىكىنىڭ تەھدىت ئاستىدا ئىكەنلىكىنى ئوتتۇرىغا قويدى.

كەچۈرۈم تەشكىلاتى كېرەم ئابدۇۋەلىنىڭ جازا مۇددىتىنىڭ سەۋەبسىز ھالدا 4 قېتىم ئارقا-ئارقىدىن ئۇزارتىلغانلىقىنى تەنقىدلەپ، خىتاي دۆلىتىدىن كېرەم ئابدۇۋەلىنى دەرھال داۋالىتىشنى ۋە تۈرمىدىن قويۇپ بېرىشنى تەلەپ قىلدى. خىتاينىڭ كېرەم ئابدۇۋەلىگە قىلىۋاتقان مۇئامىلىسىنىڭ خەلقئارا ئەھدىنامىلەرگە خىلاپ ئىكەنلىكىنى تەكىتلىگەن تەشكىلات، ئۆزىنىڭ پۈتۈن دۇنيادىكى ئەزالىرىنى، خىتاي پرېزىدېنتى خۇ جىنتاۋغا ئىمزالىق خەت يېزىش، كېرەم ئابدۇۋەلىنى داۋالىتىش ۋە قويۇپ بېرىشنى تەلەپ قىلىشقا چاقىردى.

خەلقئارا كەچۈرۈم تەشكىلاتى دۇنيادىكى نوپۇزلۇق ئاممىۋى تەشكىلاتلاردىن بىرى بولۇپ، ئۇ 1960-يىلى لوندوندا قۇرۇلغان، ئۇنىڭ بۈگۈن دۇنيادا يۈزدىن ئارتۇق شۆبىسى ۋە 3 مىليوندىن ئارتۇق ئەزاسى مەۋجۇت.