Хитай иҗтимаий пәнләр академийисиниң көк ташлиқ китабида муқимлиқни сақлашта тордики инкасларға диққәт қилиш тәшәббус қилинди

Б б с агентлиқиниң хәвиридә хитай иҗтимаий пәнләр академийисиниң көк ташлиқ китабидин нәқил елип “хитайда һәрхил иҗтимаий сәвәбләр түпәйлидин йүз бериватқан аммиви иҗтимаий наразилиқ һәрикәтлири 10 миң қетимдин ашти. Бу әһвалға қарита һөкүмәт даирилири аммиви тор бекәтлиридики пуқраларниң наразилиқ инкаслириға қарита көзитиш вә тәтқиқ қилишни күчәйтип, йүз бериш еһтимали болған аммиви наразилиқ һәрикәтлириниң алдини елишқа тиришиши керәк” дейилгән.

Көк ташлиқ китабтики статистикилиқ мәлуматлардин ашкарилинишичә, 2012-йили хитайда йүз бәргән аммиви наразилиқ һәрикәтлириниң 30 пирсәнти муһит булғиниши вә әмгәк қануниниң иҗра қилинмаслиқиға болған наразилиқ сәвәбидин йүз бәргән, 20% и башқа сәвәбләрдин йүз бәргән. Буларниң ичидә көлими әң зор болған наразилиқ намайиши хоңкоңдики 120 миң кишилик намайиш болуп, хоңкоңлуқ оқуғучилар вә ата-анилар хитай һөкүмити хоңкоңда йүргүзмәкчи болған “дөләтни сөйүш тәрбийиси” дәрсликигә наразилиқ билдүрүш үчүн уда нәччә күн намайиш елип барған.

Көк ташлиқ китабта бу һәқтә тохтилип, “әгәр, әйни чағда һөкүмәт даирилири маарип системисида бу дәрсликни өтүшни йолға қоюштин илгири аммиви тор бекәтлиридики наразилиқ инкаслириға етибар бәргән болса, хоңкоңда нәччә күн давамлашқан 100 миң кишилик аммиви наразилиқ намайишиниң йүз беришидин сақлинип қалғили болатти” дейилгән.