Xitay bayanatchi b d t ning liwiye qararini qollighanliqi toghrisida qiyin so'algha duch keldi

Xitay, b d t bixeterlik kéngishi shenbe küni chiqarghan liwiye dölet bashliqi kazafiy heqqidiki jazalash qararigha qollap awaz bergen idi.
Muxbirimiz shöhret hoshur
2011.03.01

Bügün xitayning heptilik axbarat élan qilish yighinida, xitay bayanatchi muxbirlarning bu heqtiki so'aligha duch kelgen. Muxbir bayanatchidin “Junggoning b d t ning liwiye heqqidiki jazalash qararini qollishi, junggo izchil tekitlep kéliwatqan döletlerning ichki ishigha arilashmasliq prinsipigha xilap emesmu?” dep sorighan.

Ongaysiz ehwalda qalghan bayanatchi, so'algha neq jawab bérishtin özini qachurup, junggoning liwiyining muqimliqining téz eslige kélishini xalaydighanliqini we liwiyidiki mewjut siyasiy krizisning di'alog arqiliq hel bolushini ümid qilidighanliqini bildürgen. Liwiyide inqilab bashlan'ghandin buyan xitayning liwiye weziyiti heqqidiki meydani passipliqini dawamlashturmaqta.

Xitay peqet dunya jama'et pikrining bésimi sewebidinla b d t ning shenbe künidiki mezkur qararini qollashqa mejbur bolup qalghan idi. Amérika we yawropa döletliri bolsa, liwiyidiki isyanchi xelqni ashkara qollimaqta.

Bügün fransiyining ikki tébbiy ayropilani liwiyidiki öktichi küchlerge yardem buyumlirini yetküzüp bergen. Amérikining bir türküm herbiy paraxot we urushchi ayropilanlirimu nishanini liwiyige toghrilighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.