Uyghur rayonidiki ottura - bashlan'ghuch mektepler her küni bayraq chiqirish murasimigha mejburlanmaqchi

Bügün shinxu'a agéntliqida yer alghan xewerdin melum bolushiche, Uyghur aptonom rayonluq ma'arip nazariti qarar chiqirip, 2010 - yili 1 - ayning 1 - künidin étibaren, Uyghur rayonidiki herqaysi bashlan'ghuch - ottura mekteplerde her küni etigende dölet gémini oqup, bayraq chiqirish murasimi ötküzüsh, eger hawa kilimati yar bermey, sirtta bayraq chiqirishqa purset bolmisa, oqughuchilar sinip mes'ullirining yétekchilikide siniplarda dölet gémini oqup, tamda ésiqliq turghan qizil bayraqqa qarap hörmette turush belgilen'gen.

Ma'arip nazariti yene, 50 parche "wetenperwerlik" mezmun qilin'ghan naxshini tallap s d plastinkisi ishlep tarqatqan. Belgilimige asasen, mekteplerde "qizil naxshilarni éytish herikiti" we ayda eng az ikki qétim "qizil kinolarni körüsh herikiti" élip bérilishi, her bir oqughuchi bir mewsümde eng az dégende bir parche wetenperwerlik téma qilin'ghan kitabtin birni oqushi, bir parche maqale yézishi kérek iken.

Bulardin bashqa yene, herqaysi ottura - bashlan'ghuch mekteplerde oqush mewsümi jeryanida bir qétim "wetenni medhiyilesh, jonggu kompartiyisini, milletler ittipaqliqini medhiyilesh" nutuq sözlesh musabiqiliri uyushturulidiken.

Igilinishiche, ma'arip nazariti mexsus ömek teshkillep, Uyghur rayoni miqyasida xizmet tekshürüp, mekteplerning yuqiriqi belgilimini ijra qilish ehwallirini bahalaydiken.

Közetküchiler bolsa, xitayning bu qilmishlirigha siyasiy esebiylik dep baha bermekte. Ular Uyghur rayonluq hökümet da'irilirining ösmür - balilarni exlaqiy we eqliy jehettin terbiyileshni bir chetke qayrip qoyuwatqanliqini, xitayning ichkiri ölkiliridiki mekteplerde hergizmu mewjut bolmighan we kishige medeniyet inqilabini eslitidighan bu xil heriketler arqiliq Uyghur rayonidiki ösmür balilarning zéhnini bulghawatqanliqini ilgiri sürmekte.