Хитайда 13 чоң тармақ бирликтә һәрикәт қозғап “мәсилә бар хәритә” ләрни көйдүрүшкә тәйярланмақта

Хитайниң “шинҗаң гезити” бүгүн ашкарилишичә, хитайниң дөләт өлчәш-хәритигә елиш идариси, мәркизи тәшвиқат министирлиқи, дөләт бихәтәрлик министирлиқи, дөләт җамаәт хәвпсизлик министирлиқи, маарип министирлиқи, сода министирлиқи, дөләт кабинити учур ишханиси, дөләт мәхпийәт идариси, таможна қатарлиқ 13 чоң тармақ һазир, бәлгилимигә хилап һалда нәшр қилинған хәритиләрни бир тәрәп қилиш үчүн бирлишип чоң һәрикәт қозғашқа тәйярланмақта.

Хитайниң дөләт өлчәш-хәритигә елиш идарисиниң баян қилишичә, һазир җайларда тәкшүрүп-бекитиш өлчимигә хилап һалда нәшр қилинған, әң муһими дөләт етирап қилидиған йәр намлирини қолланмиған хәритиләр көп икән, бундақ қанунсиз нәшрият буюмлири әмди чоқум китабханилардин тазилинип, көйдүрүветилиши керәк икән.

Хәвәрдә ейтилишичә, бу чоң хизмәтни орунлаш үчүн бир рәһбәрлик гурупписи қурулидикән, рәһбәрлик гуруппа түзүп чиққан қанун-бәлгилимиләр һәр қайси өлкә, аптоном районларниң әйнән иҗра қилишиға чүшүрүп берилидикән.