Ürümchi shehiri dunyadiki muhiti eng éghir bulghan'ghan on sheher arisigha kirgüzüldi

Uyghur biz torining xewer qilishiche, düshenbe küni asiya tereqqiyat bankisi we xitaydiki chingxu'a uniwérsitéti birlikte “Xitay xelq jumhuriyiti dölet muhit analizi” témisida bir parche doklat élan qilghan bolup, doklatta dunyadiki muhiti eng éghir bulghan'ghan 10 sheher belgilep chiqilghan. Bu on sheherge xitaydiki 7 sheher kirgüzülgen bolup, ürümchi shehirimu uning ichide iken.

Bu on sheher milan shehiri, méksika shehiri, téhran shehiri we xitaydiki béyjing, lenju, chungching, jinen, shijyaju'ang, teyyüen we ürümchi qatarliq sheherlerni öz ichige alidu.

Doklattin qarighanda, xitaydiki chong-kichik 500 sheherning aran bir pirsentila dunya sehiye teshkilati békitken hawa ölchimige yetken bolup, doklatta xitaydiki muhit krizisining bashqa herqandaq dölettin murekkepliki eskertilgen.

Ürümchi shehiri bir qanche yildin béri ürümchining is-tütekke tolghan hawasini onglash üchün meblegh ajritip, bir qisim kömür yéqilghu qilinidighan par ochaqlirini péchetlesh, zawutlarni retke sélishqa oxshash tedbirlerni élish arqiliq, bezi ijabiy netijilerge érishken bolsimu, emma yuqiridiki doklat netijisidin buning yenila yéterlik bolmighanliqi, ürümchi xelqining salametlikining éghir tehdit astida ikenliki melum bolmaqta.