Бу йил хитайдин 13 миң мусулман һәҗгә бариду

Хитайдин бу йил уйғур вә туңганларни өз ичигә алған 13 миң 800 мусулманниң һәҗ қилидиғанлиқи билдүрүлди. Шинхуа ахбарат агентлиқиниң илгири сүрүшичә, тунҗи түркүмдики һәҗичиләр 25‏-сентәбирдин башлап йолға чиққан.
Мухбиримиз әркин
2012.10.05
Share on WhatsApp
Share on WhatsApp

Шинхуа агентлиқиниң гәнсу диний ишлар даирилириниң сөзини нәқил кәлтүрүп бәргән бир хәвиридә, бу йил гәнсу өлкисидин 2721 нәпәр мусулманниң һәҗгә баридиғанлиқини билдүргән. Бирақ мәйли хитай ахбарат васитилиридә болсун яки уйғур аптоном райони мәтбуатлирида болсун, бу йил һәҗ қилидиған 14 миңға йеқин мусулмандин зади қанчә кишиниң уйғур икәнлики тилға елинмиған.

Хитайниң һәҗ сиясити изчил кишилик һоқуқ органлири, америка дөләт ишлар министирлиқи вә чәтәлдики уйғур тәшкилатлириниң тәнқидигә учрап кәлди.

Уларниң илгири сүрүшичә, хитай уйғурларға һәр хил һәҗ чәклимиси қоюп, тарқақ һәҗ қилишни мәни қилған. Һөкүмәт уюштурған тәшкиллик һәҗ паалийәтлиридә уйғурларға сан чәклимиси қоюлуп, һаҗиларниң һәҗ паалийитини қаттиқ контрол қилған.

Сәуди әрәбистанда олтурушлуқ уйғур муһаҗирлириниң ашкарилишичә, уйғур һәҗичиләргә хитай дөләт бихәтәрлик назаритиниң хадимлири һәмраһ болуп келип, уйғурларниң йүрүш-турушини назарәт қилиш, паспортини йиғивелиш, уларниң башқа уйғурлар билән учришишни чәкләш қатарлиқ паалийәтлирини назарәт қилишқа мәсул болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.