Хитай, пуқралири һуҗумға учриғанлиқи сәвәбидин негирийигә наразилиқ билдүрди

Өткән һәптә хитай пуқраси болған бир қурулуш ишчиси, негирийидә қораллиқ һуҗумға учрап өлгән иди.
Мухбиримиз шөһрәт һошур
2012-10-22
Елхәт
Пикир
Share
Принт

Бу мушу ай ичидә негирийидә хитай пуқралириниң иккинчи қетим һуҗумға учриши болуп, алдинқи қетимлиқи 7-өктәбир күни йүз бәргән. Иккинчи қетимлиқтиму хитай ишчи етип өлтүрүлгән иди. Хитай ташқи ишлар баянатчиси хуң лейниң бүгүн ахбаратқа ашкарилишичә, хитайниң негирийидики әлчиханиси, мәзкур вәқәдин кейин негирийә һөкүмитигә наразилиқ хети сунуп, негирийидики хитай пуқралири вә қурулушниң бихәтәрликини қоғдаш үчүн негирийә һөкүмитидин әмәлий тәдбир қоллинишни тәләп қилған.

Франсийә ахбарат агентлиқиниң бүгүнки бу һәқтики хәвиридә билдүрүшичә, негирийә һөкүмити хитай пуқрасини етип өлтүргүчиниң негирийидики «җамаәтул ихлас» намидики бир исламий тәшкилатниң әзаси икәнликини билдүргән; әмма мәзкур тәшкилатниң хитайға болған наразилиқиниң сәвәбини чүшәндүрмигән.

Хәвәрләрдин мәлум болушичә, нөвәттә көпинчә африқилиқлар, хитай ширкәтлириниң өз дөләтлиридики йолсизлиқлиридин нарази; африқидики йәнә бәзи исламий тәшкилатлар болса, хитайниң уйғурларға қаратқан бастуруш һәрикәтлиридин нарази. Шуңа йеқинқи йиллардин бери африқа дөләтлиридә хитай пуқралириға қарши һуҗумлар вақит арилап йүз берип турмақта.

Толуқ бәт