Türmidiki yazghuchi nurmemet yasinning a'ilisi 17‏-yanwar uning bilen körüshken

Mezkur yézidiki weqedin xewerdar ismini ashkarilashni xalimaydighan bir kishi yazghuchining a'ilisidin uning saq-salamet turghanliqini anglighan. Yéqinda nurmemet yasinning 2011‏-yili shayardiki bir türmide wapat bolghanliq xewiri tarqilip, xelq'ara kishilik hoquq teshkilatlirining diqqitini qozghighan. Xelq'ara kechürüm teshkilati qatarliq nurghun teshkilatlar bayanat élan qilip, xitay hökümitidin yazghuchining ehwalini aydinglashturup bérishni telep qilghan. Biraq xitay hökümiti bu chaqiriqlargha héchqandaq inkas qayturmighan idi.

Nurmemetning wapat bolghanliq xewirini ataqliq xitay kishilik hoquq adwokati téng byaw otturigha qoyghan. Téng byaw bu xewerni özining Uyghur dostliridin anglighanliqi, nurmemetning ataqliq xitay kishilik hoquq pa'aliyetchisi gawjishing yatqan türmige yötkep apirilghanliqi we uning shu yerde késellik sewebidin wapat bolghanliqini ilgiri sürgen.

Maralbéshidiki xewer menbesi yazghuchining salamet turghanliqini bildürgen bolsimu, biraq uning tepsiliy ehwaligha munasiwetlik uchurlar heqqide melumat bermidi. Nurmemet yasin “Qeshqer edebiyati” zhurnilida élan qilin'ghan “Yawa kepter” namliq hékayisi sewebidin 2005‏-yili qolgha élin'ghan. U “Bölgünchilikke qutratquluq qilish jinayiti” bilen eyiblinip, 10 yilliq qamaq jazasigha höküm qilin'ghan idi.