Президент обама демократлар партийисиниң президент намзатлиқини қобул қилди

Обама америкилиқларниң өзини йәнә бир қетим сайлишини тәләп қилип, америка үчүн яхши күнләрниң алдида икәнликини билдүрди. У бу җәрянда хитайни икки қетим тилға алди. Бир қетимлиқида у җумһурийәтчиләр президент намзати мит румнейниң ташқи сиясәт тәҗрибиси йоқлуқини әскәртип: әгәр сиз олимпик йиғинини зиярәт қилғанда америкиниң әң йеқин иттипақдишиниң көңлигә азар бәрмәсликни билмисиңиз, бу дегәнлик сизниң бейҗиң билән дипломатик мунасивәт қилишқа тәйярлиқиңиз йоқ, дегәнликтур, дәп көрсәтти.

Җумһурийәтчиләр намзати мит ромней лондон олимпик һарписида әнглийини зиярәт қилип, лондон шәһириниң олимпик тәйярлиқини тәнқид қилған. Лекин бу әнглийиниң наразилиқини қозғиған иди. Обама нутқида йәнә әскәртип, америкилиқлар дуч кәлгән мәсилә ноқул икки намзаттин кимни сайлаш, икки партийидин қайси бирини таллаш мәсилиси әмәслики, бу охшимиған икки хил америкиға елип баридиған йолниң бирини талаш мәсилиси икәнликини көрсәтти.

Обама, иқтисадниң әслигә келиш сүритиниң астилиқи униң келәчәк ишәнчигә җиддий риқабәт пәйда қиливатқанлиқини әскәртип, лекин сайлиғучилирини униңға ишинишкә, униң башқурушида америкиниң әң ронақ тапқан күнлириниң йетип келидиғанлиқини билдүрди. Бирақ обама йәнә, өзиниң көрсәткән йолини наһайити асан вә тез, дәп пәрдазланмайдиғанлиқи, бирақ америка йәнә бир қанчә йил күчисә, нәччә йиллардин бери йиғилип қалған мәсилиләрни һәл қилип кетидиғанлиқини әскәртти.