Uyghur aptonom rayon da'iriliri jem'iyettin 11502 neper oqutquchi qobul qilidighanliqini élan qildi

30-May küni élan qilin'ghan bu uqturushta bayan qilinishiche, bu qétim qobul qilinidighan oqutquchilargha xitay tili ötkilidin ötüsh aldinqi shert qilin'ghan bolup, oqutquchilarning pütün memliket da'irisidiki aliy mektep hem ottura téxnikom sewiyisidin yuqirilar ichidin qobul qilinidighanliqi uqturulghan. Uqturushta rayondiki az sanliq milletler ichidin oqutquchiliqqa iltimas qilghuchilarning bashlan'ghuch ottura mektep sewiyisi boyiche, choqum xitay tili sewiye imtihanining 3-4-5-derijilik ölchimige yétishi shert ikenlikini bildürülgen.

Radi'omiz Uyghur élidin igiligen uchurlardin melum bolushiche, xitay hökümiti rayonda “Qosh tilliq ma'arip” namidiki Uyghur tilini xitaychilashturush siyasitini yolgha qoyghandin buyan, Uyghur bashlan'ghuch ottura mektepliride uzun yildin buyan oqutquchiliq qilip kéliwatqan tejribilik Uyghur oqutquchilirini türküm-türkümlep “Xitay tili ötkilidin ötelmidi” dégen bahanide, pénsiye yéshi toshmastinla muddettin burun xizmettin boshitilghan.

Igilishimizche nöwette xizmitidin ayrilghan Uyghur oqutquchilirining xizmet orunlirigha xitay ölkiliridin kelgen Uyghur tilini bilmeydighan xitaylar orunlashturuluwatqan bolup, bu xil ehwalgha qarita Uyghur oqutquchilirila emes belki kelgüsi ewladlarning Uyghur tili muhitidin ayrilip qélishidin ensirewatqan Uyghur ata-anilar hem jemiyetningmu naraziliqi barghanche kücheytmekte iken.