Өркәш дөләт японийидә тутқун қилинди

Сақчи даирилири өркәшниң башқиларниң туралғу җайиға қанунсиз кирмәкчи болғанлиқини әскәртип, униң җүмә күни чүштин кейин саәт 2:30 әтрапида хитай әлчиханисиниң дәрвазиси алдидики тосақтин өтүп әлчиханиға мәҗбурий кирмәкчи болғанлиқини билдүргән.

Японийә кйото агентлиқиниң хәвәр қилишичә, өркәш хитай әлчиханисиға өзини мәлум қилип, хитайда сотлинишни қобул қилмақчи икән. Лекин әлчихана уни қобул қилишни рәт қилғандин кейин, әлчиханиға мәҗбурий кирмәкчи болған. Бу вәқә "4‏ - июн тйәнәнмен вәқәси"ниң дәл 21 йиллиқ хатирә күни йүз бәрди.

Хитай һөкүмити 1989 - йили "4‏ - июн вәқәси"дин кейин өркәш дөләт үстидин тутуш буйруқи чиқарған. Лекин хитайниң җүмә күни өркәшни қобул қилишни рәт қилип, униң өзини мәлум қилишидин өзини қачуруши көзәткүчиләрниң диққитини қозғиди.

Тәйвәнниң токйодики вакаләтханиси өркәшниң җуңхуа минго пуқраси икәнликини әскәртип, әгәр өркәш тәләп қилса, униңға қанун йолға қойған даирисдә ярдәм қилидиғанлиқини билдүргән.